Namanganda er-xotin tarvuzdan zaharlanib vafot etgan oilaning yana to‘rt nafar vakili kasalxonada qolmoqda. Bu haqda “Daryo” muxbiri Azizbek Abduvaliyev xabar bermoqda.
Norin tuman tibbiyot birlashmasi mutasaddilarining bildirishicha, 2022-yil 11-avgust kuni tongda tez yordam bo‘limiga tumanning “Katta yaydoq” mahallasidagi xonadonlardan biriga chaqiruv bo‘lgan. Murojaat etilgan manzilga yetib borgan tibbiyot xodimlari uy egalari — 1954-yilda tug‘ilgan erkak va 1959-yilda tug‘ilgan ayolda biologik o‘lim holatini qayd etgan.
Xonadonning boshqa vakillari — 1985-yilda tug‘ilgan ayol va uning 10 yashar o‘g‘li, 6 yoshli qizi va 1991-yilda tug‘ilgan singlisi zudlik bilan tibbiyot birlashmasining yuqumli kasalliklar bo‘limiga yotqizilgan.
“Ularda ko‘ngil aynishi, ich ketishi, qorin og‘rig‘i va harorat ko‘tarilishi kuzatilayotgandi. Birlamchi alomatlaridan kelib chiqib, o‘tkir diareya tashxisi qo‘yildi. Ko‘rsatilgan muolajalardan so‘ng ahvollari yaxshilandi, hozirda holatlari barqaror. Bakteriologik tahlil natijalarini olganimizdan so‘ng uylariga javob berishimiz mumkin. Vafot etgan fuqarolar, ya’ni bo‘limimizda davolanayotgan opa-singillarning ota-onasiga kelsak, ular tibbiyot birlashmasiga olib kelinmagan, balki yashash xonadonlarida vafot etishgan. Biz kutayogan tahlil natijalari ularning o‘limi sabablariga ham oydinlik kiritadi”, — deydi Norin tuman tibbiyot birlashmasi yuqumli kasalliklar bo‘limi boshlig‘i Odiljon Mansurov.
Bo‘limga keltirilgan bemorlardan biri, 31 yoshli Ra’no Ashurovaning aytishicha, u va oila a’zolari shifoxonaga ancha og‘ir holatda yotqizilgan. Tibbiy muolajalar, dori-darmonlar va shifokorlarning qarovidan so‘ng vaziyat o‘zgargan. Hozirda biroz madorsizlik kuzatilayotgan bo‘lsa ham, o‘zlarini yaxshi his etmoqda.
Ma’lumot uchun, hozirda mazkur holat yuzasidan Norin tuman prokuraturasi tomonidan tergovga qadar tekshiruv harakatlari olib borilmoqda.
Mavzuga doir: Tarvuzdan zaharlanmaslik uchun nima qilish kerak – mutaxassis tavsiyasi
Izoh (0)