Наманганда эр-хотин тарвуздан заҳарланиб вафот этган оиланинг яна тўрт нафар вакили касалхонада қолмоқда. Бу ҳақда «Дарё» мухбири Азизбек Абдувалиев хабар бермоқда.
Норин туман тиббиёт бирлашмаси мутасаддиларининг билдиришича, 2022 йил 11 август куни тонгда тез ёрдам бўлимига туманнинг «Катта яйдоқ» маҳалласидаги хонадонлардан бирига чақирув бўлган. Мурожаат этилган манзилга етиб борган тиббиёт ходимлари уй эгалари — 1954 йилда туғилган эркак ва 1959 йилда туғилган аёлда биологик ўлим ҳолатини қайд этган.
Хонадоннинг бошқа вакиллари — 1985 йилда туғилган аёл ва унинг 10 яшар ўғли, 6 ёшли қизи ва 1991 йилда туғилган синглиси зудлик билан тиббиёт бирлашмасининг юқумли касалликлар бўлимига ётқизилган.
«Уларда кўнгил айниши, ич кетиши, қорин оғриғи ва ҳарорат кўтарилиши кузатилаётганди. Бирламчи аломатларидан келиб чиқиб, ўткир диарея ташхиси қўйилди. Кўрсатилган муолажалардан сўнг аҳволлари яхшиланди, ҳозирда ҳолатлари барқарор. Бактериологик таҳлил натижаларини олганимиздан сўнг уйларига жавоб беришимиз мумкин. Вафот этган фуқаролар, яъни бўлимимизда даволанаётган опа-сингилларнинг ота-онасига келсак, улар тиббиёт бирлашмасига олиб келинмаган, балки яшаш хонадонларида вафот этишган. Биз кутаёган таҳлил натижалари уларнинг ўлими сабабларига ҳам ойдинлик киритади», — дейди Норин туман тиббиёт бирлашмаси юқумли касалликлар бўлими бошлиғи Одилжон Мансуров.
Бўлимга келтирилган беморлардан бири, 31 ёшли Раъно Ашурованинг айтишича, у ва оила аъзолари шифохонага анча оғир ҳолатда ётқизилган. Тиббий муолажалар, дори-дармонлар ва шифокорларнинг қаровидан сўнг вазият ўзгарган. Ҳозирда бироз мадорсизлик кузатилаётган бўлса ҳам, ўзларини яхши ҳис этмоқда.
Маълумот учун, ҳозирда мазкур ҳолат юзасидан Норин туман прокуратураси томонидан терговга қадар текширув ҳаракатлари олиб борилмоқда.
Мавзуга доир: Тарвуздан заҳарланмаслик учун нима қилиш керак – мутахассис тавсияси
Изоҳ (0)