O‘zbekiston xalqaro armiya o‘yinlarining “Elbrus halqasi” musobaqasida birinchi o‘rinni qo‘lga kiritdi

Rossiya Kabardino-Balkariya Respublikasining Terskol hududida Xalqaro armiya o‘yinlari doirasida o‘tkaziladigan “Elbrus halqasi” musobaqasining ochilish marosimi bo‘lib o‘tdi. Bu haqda Mudofaa vazirligiga tayanib Dunyo axborot agentligi xabar bermoqda.

Qayd etilishicha, marosimda Armaniston, Abxaziya, Rossiya, O‘zbekiston, Xitoy, Hindiston, Qozog‘iston, Uganda va Janubiy Osetiya vakillari ishtirok etgan.

Ochilish marosimidan so‘ng musobaqaga start berilib, jamoalar birinchi shart bo‘yicha o‘zaro bellashgan. Turli murakkablikdagi vazifalarni o‘z ichiga olgan jami 16 ta shartning dastlabkisi — sun’iy qoya relefiga yakka tartibda tezkor chiqish bo‘lgan.

Birinchi shart yakunlariga ko‘ra, O‘zbekiston jamoasi eng yaxshi natijani ko‘rsatib (811 ball), birinchi o‘rinni qo‘lga kiritgan. Qozog‘istonliklar ikkinchi o‘rinni (757 ball) band etgan bo‘lsa, Rossiya jamoasi kuchli uchlikdan (708 ball) o‘rin olgan.

Bu birinchi shart bo‘yicha jamoalarning qo‘lga kiritgan natijalari hisoblanadi. Hali oldinda yana 15 ta shart bor.

Ma’lumot uchun, o‘zbekistonlik harbiy xizmatchilar o‘tgan yili “Elbrus halqasi” musobaqasida mezbon davlatdan keyin 2-o‘rinni qo‘lga kiritgan edi.