Россия Кабардино-Балкария Республикасининг Терскол ҳудудида Халқаро армия ўйинлари доирасида ўтказиладиган «Элбрус ҳалқаси» мусобақасининг очилиш маросими бўлиб ўтди. Бу ҳақда Мудофаа вазирлигига таяниб Дунё ахборот агентлиги хабар бермоқда.
Қайд этилишича, маросимда Арманистон, Абхазия, Россия, Ўзбекистон, Хитой, Ҳиндистон, Қозоғистон, Уганда ва Жанубий Осетия вакиллари иштирок этган.
Очилиш маросимидан сўнг мусобақага старт берилиб, жамоалар биринчи шарт бўйича ўзаро беллашган. Турли мураккабликдаги вазифаларни ўз ичига олган жами 16 та шартнинг дастлабкиси — сунъий қоя релефига якка тартибда тезкор чиқиш бўлган.
Биринчи шарт якунларига кўра, Ўзбекистон жамоаси энг яхши натижани кўрсатиб (811 балл), биринчи ўринни қўлга киритган. Қозоғистонликлар иккинчи ўринни (757 балл) банд этган бўлса, Россия жамоаси кучли учликдан (708 балл) ўрин олган.
Бу биринчи шарт бўйича жамоаларнинг қўлга киритган натижалари ҳисобланади. Ҳали олдинда яна 15 та шарт бор.
Маълумот учун, ўзбекистонлик ҳарбий хизматчилар ўтган йили «Элбрус ҳалқаси» мусобақасида мезбон давлатдан кейин 2-ўринни қўлга киритган эди.
Изоҳ (0)