Ijtimoiy tarmoqlarida Farg‘onada janjallar uyasiga aylanib qolgan norasmiy tillo bozori haqida xabarlar tarqaldi. Farg‘ona viloyati Ichki ishlar boshqarmasi holatga munosabat bildirdi.
O‘rganishlar natijasida ma’lum bo‘lishicha, Farg‘ona shahar Bozorboshi va Sanoat ko‘chalari kesishmasidagi piyodalar yo‘lagi ikki chetida 10 ga yaqin zargarlik do‘konlari qo‘yilgan. Shu joy yaqinida “Fayzli Farg‘ona Bahori” MCHJga qarashli oshxona faoliyat olib boradi. Oshxonaning Bozorboshi ko‘chasi tomonidan kirish chiqish eshigi zinasining o‘ng tomonida 2 ta ko‘chma zargarlik do‘koni qo‘yilgan. Ushbu oshxona va do‘kon egalari do‘konni boshqa joyga ko‘chirish masalasida muntazam tortishib kelishgan.
Joriy yilning fevral oyida ham oshxona va zargarlik do‘koni egalari o‘rtasida og‘zaki janjal kelib chiqqani sababli profilaktika inspektorlari tomonidan 6 nafar shaxsga nisbatan Ma’muriy javobgarlik to‘g‘risidagi kodeksning 183-moddasi (mayda bezorilik) tartibida hujjatlar rasmiylashtirilib, to‘plangan hujjatlar Farg‘ona shahar sudiga yuborilgan.
Joriy yilning 10-avgust kuni viloyat IIBga fuqaro A.G. murojaat qilib, yuqoridagi manzilda T.M., S.K. ismli shaxslar unga tegishli savdo do‘konini o‘zboshimchalik bilan buzib yuborayotgani sababli qonuniy chora ko‘rishni so‘ragan. Chaqiruvga asosan profilaktika inspektori hodisa joyiga yetib borib, holat yuzasidan tegishli tartibda hujjatlar rasmiylashtirilgan. Yetkazilgan zararni aniqlash maqsadida baholash ekspertizasi tayinlangan.
Hozirda mazkur holat yuzasidan tergovga qadar tekshiruv harakatlari olib borilmoqda.
Izoh (0)