Farg‘ona viloyati Quvasoy shahrida ayollar gashish giyohvandlik moddasini sotgan vaqtda qo‘lga olindi. Bu haqda viloyat ichki ishlar boshqarmasi axborot xizmati xabar berdi.
Ma’lum qilinishicha, 10-avgust kuni Farg‘ona viloyati IIB JQB va Quvasoy shahri IIB JQB xodimlari hamkorlikda tezkor tadbir o‘tkazgan. Jarayon davomida “Kokilon” mahallasi hududida Ya.M. va U.M. ismli ayollar bir guruh bo‘lgan holda 938 kilogramm miqdordagi temir buyumlar evaziga qog‘ozga o‘ralgan gashish moddasini sotgan vaqtda tadbir ishtirokchilari tomonidan daliliy ashyo bilan ushlangan.
Holat yuzasidan Quvasoy shahri IIB huzuridagi tergov bo‘limi tomonidan Jinoyat kodeksining 273-moddasi (giyovandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek ularni qonunga xilof ravishda o‘tkazish) 5-qismi bilan jinoyat ishi qo‘zg‘atilib, ayollar protsessual tartibda ushlangan.
Jinoyat kodeksining 273-moddasi 5-qismida ko‘rsatilgan jinoyatni sodir etgan shaxs 20 yilgacha ozodlikdan mahrum qilish bilan jazolanishi mumkin.
Izoh (0)