O‘zbekistonda hokimlar faoliyati samaradorligini baholashda jamoat transporti va infratuzilmasi sifati e’tiborga olinishi kutilmoqda. Bu haqda “Hududlarda yo‘lovchi tashish tizimini yanada rivojlantirishga doir qo‘shimcha chora-tadbirlar to‘g‘risida”gi prezident qarori loyihasida ko‘zda tutilgan.
Hujjatga ko‘ra, 2023-yil 1-yanvardan boshlab Qoraqalpog‘iston Vazirlar Kengashi raisi va viloyatlar, shahar va tumanlar hokimlari faoliyati samaradorligini baholashda hududdagi avtobus yo‘nalishlari tarmog‘i, avtobuslar soni, jamoat transporti va infratuzilmasi sifati, bajarilgan ish hajmlari, moliyaviy qo‘llab-quvvatlash uchun ajratilgan mablag‘lar kabi ko‘rsatkichlar e’tiborga olinadi.
Qoraqalpog‘iston Vazirlar Kengashi, viloyat hokimliklari Transport vazirligi bilan birgalikda har yili kamida bir marta shahar avtobus yo‘nalishlarida qo‘llanilayotgan yo‘lkira tariflari amaldagi haqiqiy xarajatlardan kelib chiqqan holda qayta ko‘rib chiqilishini ta’minlaydi.
Shuningdek, mahalliy budjetlar parametrlari shakllantirilayotganda shahar yo‘nalishlarida cheklangan tariflar bo‘yicha yo‘lovchilar tashish natijasida tashuvchilari ko‘radigan zararlarni qoplash uchun mablag‘lar ko‘zda tutilishini va ushbu mablag‘lar tashuvchilarga belgilangan tartibda to‘lab berilishini ta’minlaydi.
Ushbu qonun loyihasi muhokamasi 25-avgustga qadar davom etadi.
Mavzuga doir: O‘zbekistonda jamoat transporti, taksilar faoliyatini tartibga solish, aeroportlar boshqaruvida Singapur tajribasi o‘rganiladi
Izoh (0)