Jizzax shahrida uch kishi o‘rtasida yuz bergan janjal ularning ikki nafari pichoqlanishi bilan yakunlandi. Bu haqda viloyat IIB axborot xizmati xabar qildi.
Ma’lum qilinishicha, 8-avgust kuni soat 21:30 larda mavsumiy ishchilar — Zarbdor tumani “Taraqqiyot” mahallasi hamda Forish tumani “Bog‘don” qishloq fuqarolar yig‘inida istiqomat qiluvchi 38 va 31 yoshli ikki fuqaro o‘zaro gaplashib turgan. Ularning suhbatiga kelib qo‘shilgan Samarqand viloyati Bulung‘ur tumani “Qangli” qishlog‘ida yashovchi fuqaroning (1966-yilda tug‘ilgan) ko‘ylagi cho‘ntagidan zarbdorlik shaxs hazillashib 50 ming so‘m pulini olib qo‘ygan vaqtida janjal kelib chiqqan.
Nizo davomida bulung‘urlik shaxs sumkasida bo‘lgan oshxona pichog‘i bilan ushbu ikki fuqaroga tan jarohati yetkazgan. Oqibatda Zarbdor tumanida yashovchi fuqaro ko‘rsatilgan tibbiy yordamga qaramasdan vafot etgan, tan jarohati olgan ikkinchi shaxs esa Respublika shoshilinch tez tibbiy yordam ilmiy markazi Jizzax filialining jonlantirish bo‘limiga yotqizilgan.
Holat yuzasidan Jizzax shahar prokuraturasi tomonidan jinoyat ishi qo‘zg‘atilib, gumonlanuvchi ehtiyot chorasi sifatida qamoqqa olingan.
Mavzuga doir:
Izoh (0)