Namangan viloyatining To‘raqo‘rg‘on tumani dalalarida paxta ochildi. Bu haqda “Daryo” muxbiri Azizbek Abduvaliyev xabar bermoqda.
Paxta ochilgan dalalar tumandagi “Baxtiyor Ne’matjon Shavkatjon” fermer xo‘jaligiga qarashli. Bu yerda 116 gektar maydonda “Andijon-35” navi ekilgan bo‘lib, yakunda jami 477,2 tonna xom ashyo yig‘ishtirib olish ko‘zda tutilgan.
Fermer xo‘jaligi rahbari Bahodir Tojiboyev bu yil paxta odatdagidan o‘n kun ertaroq yetilganini havo harorati o‘ta issiq kelgani bilan izohlamoqda. Qolaversa, xo‘jalik paxta maydonlarining 95 gektariga plyonka tortilgan, 75 gektarida esa tomchilatib sug‘orish texnologiyasi joriy etgan.
Tojiboyevning hisob-kitoblariga ko‘ra, joriy yil 1-sentyabrga qadar paxtaning 90 foizi ochiladi va bayramdan so‘ng bemalol yig‘im-terimga tushsa bo‘ladi.
Ma’lumot uchun, O‘zbekistonda joriy yil o‘rta tolali paxta xomashyosining minimal narxi qo‘shilgan qiymat solig‘i bilan birga 10 025 ming so‘mni tashkil etmoqda. O‘tgan yili bu ko‘rsatkich 7100 so‘mga teng bo‘lgandi.
Mavzuga doir:
Izoh (0)