“Yur, muhabbat, ketdik bu yerdan” qo‘shig‘ining mualliflik huquqini buzgan san’atkorga chora ko‘rildi

Adliya vazirligi tomonidan O‘zbekiston Respublikasi Mualliflik va turdosh huquqlarni himoya qilish jamiyatining taniqli xonanda Nuriddin Haydarov tomonidan ijro etilgan “Yur, muhabbat, ketdik bu yerdan” qo‘shig‘i ijrochining huquqiy vorisi H.Haydarovning ruxsatisiz va tegishli tartibda shartnoma tuzmagan holda foydalanilganligi yuzasidan qonuniy chora ko‘rish to‘g‘risidagi murojaati ko‘rib chiqildi.

Murojaatni ko‘rib chiqish davomida fuqaro I.E.tomonidan mulkiy huquqlar H.Haydarovga tegishli bo‘lgan “Yur, muhabbat, ketdik bu yerdan” qo‘shig‘i huquq egasining ruxsatisiz hamda tegishli tartibda shartnoma tuzmasdan ijro etilganligi aniqlandi.

Holat yuzasidan fuqaro I.E. ga nisbatan Ma’muriy javobgarlik to‘g‘risidagi kodeksining 177 (1)-moddasi bilan ma’muriy huquqbuzarlik to‘g‘risidagi bayonnoma rasmiylashtirilib, javobgarlik masalasini ko‘rib chiqishlik uchun Jinoyat ishlari bo‘yicha Mirobod tuman sudiga yuborildi.

Sud qaroriga ko‘ra, huquqbuzarga nisbatan Ma’muriy javobgarlik to‘g‘risidagi kodeksining 177 (1)-moddasi birinchi qismida nazarda tutilgan huquqbuzarlik sodir etgani uchun jarima jazosi tayinlandi.

Bundan tashqari, O‘zbekiston Respublikasining “Mualliflik huquqi va turdosh huquqlar to‘g‘risida”gi qonuni 65-moddasiga muvofiq huquq egasi zararlar yetkazilishi faktidan qat’i nazar huquqbuzardan bazaviy hisoblash miqdorining 20 baravaridan 1000 baravarigacha tovon puli talab qilish huquqiga ega.