Адлия вазирлиги томонидан Ўзбекистон Республикаси Муаллифлик ва турдош ҳуқуқларни ҳимоя қилиш жамиятининг таниқли хонанда Нуриддин Ҳайдаров томонидан ижро этилган «Юр, муҳаббат, кетдик бу ердан» қўшиғи ижрочининг ҳуқуқий вориси Ҳ.Ҳайдаровнинг рухсатисиз ва тегишли тартибда шартнома тузмаган ҳолда фойдаланилганлиги юзасидан қонуний чора кўриш тўғрисидаги мурожаати кўриб чиқилди.
Мурожаатни кўриб чиқиш давомида фуқаро И.Э.томонидан мулкий ҳуқуқлар Ҳ.Ҳайдаровга тегишли бўлган «Юр, муҳаббат, кетдик бу ердан» қўшиғи ҳуқуқ эгасининг рухсатисиз ҳамда тегишли тартибда шартнома тузмасдан ижро этилганлиги аниқланди.
Ҳолат юзасидан фуқаро И.Э. га нисбатан Маъмурий жавобгарлик тўғрисидаги кодексининг 177 (1)-моддаси билан маъмурий ҳуқуқбузарлик тўғрисидаги баённома расмийлаштирилиб, жавобгарлик масаласини кўриб чиқишлик учун Жиноят ишлари бўйича Миробод туман судига юборилди.
Суд қарорига кўра, ҳуқуқбузарга нисбатан Маъмурий жавобгарлик тўғрисидаги кодексининг 177 (1)-моддаси биринчи қисмида назарда тутилган ҳуқуқбузарлик содир этгани учун жарима жазоси тайинланди.
Бундан ташқари, Ўзбекистон Республикасининг «Муаллифлик ҳуқуқи ва турдош ҳуқуқлар тўғрисида»ги қонуни 65-моддасига мувофиқ ҳуқуқ эгаси зарарлар етказилиши фактидан қатъи назар ҳуқуқбузардан базавий ҳисоблаш миқдорининг 20 бараваридан 1000 бараваригача товон пули талаб қилиш ҳуқуқига эга.
Изоҳ (0)