12-avgust kuni Nyu-York shtatida suiqasd uyushtirilgan britaniyalik yozuvchi Salmon Rushdiy kasalxonada shoshilinch tarzda operatsiya qilindi — hozir u sun’iy nafas oldirish apparatiga ulangan, deb yozadi Meduza uning agenti Endryu Uayliga tayanib.
“Yangiliklar unchalik quvonchli emas. Salmon, katta ehtimol bilan bitta ko‘zidan ayriladi; qo‘lidagi nervlar kesilib ketgan; jigariga esa pichoq bilan zarar yetkazilgan”, — deyiladi Uaylining bayonotida.
75 yoshli Salmon Rushdiy Chautokva shahrida hujumga uchradi, yozuvchi u yerda Chautauqua Institution ta’lim markazida ma’ruza o‘qishi kerak edi. Tadbir boshlanishidan oldin sahnaga bir erkak chiqib olib, pichoq va mushti bilan yozuvchiga bir necha marta zarba berdi. Shuningdek, u sahnada Rushdiy bilan turgan uchrashuv moderator Ralf Genri Rizga zarar yetkazdi.
Hujum qilgan shaxs darhol politsiya tomonidan qo‘lga olindi, yozuvchi esa zudlik bilan vertolyot orqali kasalxonaga yuborildi.
Politsiya hujum qilishda gumonlanayotgan shaxsning kimligini aniqladi — u Nyu-Jersi shtatining 24 yoshli fuqarosi Xadi Matar. Nima maqsadda yozuvchiga hujum qilgani hozircha aniq emas.
1988-yilda Salmon Rushdiyning “Shaytoniy she’rlar” kitobi chiqqan va musulmon mamlakatlarida noroziliklarni keltirib chiqargan edi, u yerlarda kitob dinni tahqirlovchi deb topildi. Eronda kitob taqiqlandi, 1989-yilda esa mamlakat yetakchisi oyatulla Homeyniy yozuvchini o‘limga chaqiruvchi fatvoni chiqardi.
Eronda Rushdiyni o‘ldirgan odamga mukofot puli e’lon qilindi, 2012-yilda uning qiymati 2,8 milliondan 3,3 milliongacha oshirildi. Rushdiyning o‘zi odamlar bunday mukofot puliga qiziqayotganini isbotlovchi dalillar yo‘qligini aytgandi. 2012-yilda Rushdiy “Shaytoniy she’rlar” haqidagi bahslardan keyin o‘z hayoti haqida “Jozef Anton: memuarlar” nomli hikoya chop etdi.
Izoh (0)