Jahon sog‘liqni saqlash tashkiloti (JSST)ning bir guruh ekspertlari maymunchechak virusi variantlariga yangi nomlar haqida kelishib oldi, deb yozadi “RBK”. Endi variantlar Rim raqamlari bilan ifodalanadi.
Shu tariqa, Kongo havzasi (Markaziy Afrika) varianti endi I klada (variant), G‘arbiy Afrika varianti esa II klada deb atash haqida kelishib olindi.
Iyul oxirida Nyu-York sog‘liqni saqlash komissari Eshvin Vasan JSST rahbari Tedros Gebreyesusdan maymunchechakka yangi nom berishni so‘ragan edi. Bu nom, uning fikricha, bir qator irqlar vakillariga, masalan, qora tanlilarga og‘ir botishi mumkin.
Maymunchechak — shu nomli virus keltirib chiqaruvchi kasallik. SImptomlari — bezgak, kuchli bosh og‘rig‘i, mushaklar va beldagi og‘riq, holsizlik, limfa bezlarining kattalashuvi hamda terida toshmalar yoki yaralar paydo bo‘lishidan iborat.
Odamning maymunchechakka chalinishi bilan bog‘liq birinchi holat 1970-yilda Kongo Demokratik Respublikasida to‘qqiz yoshli o‘g‘il bolada qayd etilgan, u yerda tabiiy chechakka 1968-yilda barham berilgandi. O‘shandan buyon kasallanish holatlarining aksariyati Markaziy va G‘arbiy Afrika mamlakatlariga to‘g‘ri keladi.
May oyida maymunchechak endemik bo‘lmagan (ushbu kasallik xos bo‘lmagan) mamlakatlarda avj ola boshladi. JSST ma’lumotlariga ko‘ra, hozirgacha butun dunyoda 31,6 mingdan ortiq odam virusni yuqtirib, 12 kishi vafot etgan.
23-iyul kuni JSST infeksiya tarqalishini jamoat sog‘lig‘ini saqlash sohasidagi favqulodda vaziyat deb e’lon qildi.
Izoh (0)