Vashington AQSH Vakillar palatasi spikeri Nensi Pelosining Tayvanga tashrifi natijasida yuzaga kelgan keskinlikdan foydalanib, mintaqadagi harbiy ishtirokini kuchaytirishi mumkin, dedi XXR tashqi ishlar vaziri Van I.
“Bu nafaqat borib turgan va asossiz provokatsiya, balki muvaffaqiyatsizlikka uchrashi aniq bo‘lgan siyosiy maynabozchilik hamdir. Tayvan bo‘g‘ozidagi joriy vaziyat hali ham notinch. Biz ogohlikni saqlab turibmiz, chunki AQSH bu muammodan foydalanishi va yanada jiddiyroq inqirozni yuzaga keltirish uchun harbiy ishtirokini kuchaytirishi mumkin”, — dedi Van I.
Tashqi siyosiy idora rahbari qayd etishicha, “AQSHning Tayvan masalasidagi munofiqligi va qasddan provokatsiyasi unga Pekin va dunyo hamjamiyati tomonidan bo‘lgan ishonchga yanada ko‘proq putur yetkazishi mumkin”.
“1,4 milliarddan ziyod xitoyliklarning dushmani bo‘lish — yaxshi narsa bilan tugashi mumkin emas”, — deya qayd etdi vazir.
Van I qo‘shimcha qilishicha, boshqa mamlakatlardagi bir qator siyosatchilar orolning mustaqilligini yoqlab chiqmoqda va AQSHdan o‘rnak olishi mumkin. Ushbu davlatlar hukumatlari “vaziyatga noto‘g‘ri baho bermoqda”, bu esa ularning Xitoy bilan aloqalari buzilishiga olib kelishi mumkin, deya ogohlantirdi diplomat.
“Ehtiyot bo‘ling, ba’zi mamlakatlar siyosiy arboblari AQSHga ergashishi mumkin, bu bilan Xitoy bilan aloqalarning siyosiy asosiga putur yetkazadi hamda BMT nizomiga va Ikkinchi jahon urushidan keyin shakllangan xalqaro tizimga zarba beradi”, — dedi Van I.
Tayvan atrofidagi vaziyatning keskinlashuvi AQSH Kongressi Vakillar palatasi spikeri Nensi Pelosining orolga tashrifi tufayli yuz berdi. Ushbu safardan keyin Xitoy Tayvan sohillari yaqinida katta ko‘lamli harbiy mashg‘ulotlar boshladi va orolga qarshi sanksiyalar e’lon qildi.
Izoh (0)