12 август куни Нью-Йорк штатида суиқасд уюштирилган британиялик ёзувчи Салмон Рушдий касалхонада шошилинч тарзда операция қилинди — ҳозир у сунъий нафас олдириш аппаратига уланган, деб ёзади Meduza унинг агенти Эндрю Уайлига таяниб.
«Янгиликлар унчалик қувончли эмас. Салмон, катта эҳтимол билан битта кўзидан айрилади; қўлидаги нервлар кесилиб кетган; жигарига эса пичоқ билан зарар етказилган», — дейилади Уайлининг баёнотида.
75 ёшли Салмон Рушдий Чаутоква шаҳрида ҳужумга учради, ёзувчи у ерда Chautauqua Institution таълим марказида маъруза ўқиши керак эди. Тадбир бошланишидан олдин саҳнага бир эркак чиқиб олиб, пичоқ ва мушти билан ёзувчига бир неча марта зарба берди. Шунингдек, у саҳнада Рушдий билан турган учрашув модератор Ральф Генри Ризга зарар етказди.
Ҳужум қилган шахс дарҳол полиция томонидан қўлга олинди, ёзувчи эса зудлик билан вертолёт орқали касалхонага юборилди.
Полиция ҳужум қилишда гумонланаётган шахснинг кимлигини аниқлади — у Нью-Жерси штатининг 24 ёшли фуқароси Хади Матар. Нима мақсадда ёзувчига ҳужум қилгани ҳозирча аниқ эмас.
1988 йилда Салмон Рушдийнинг «Шайтоний шеърлар» китоби чиққан ва мусулмон мамлакатларида норозиликларни келтириб чиқарган эди, у ерларда китоб динни таҳқирловчи деб топилди. Эронда китоб тақиқланди, 1989 йилда эса мамлакат етакчиси оятулла Ҳомейний ёзувчини ўлимга чақирувчи фатвони чиқарди.
Эронда Рушдийни ўлдирган одамга мукофот пули эълон қилинди, 2012 йилда унинг қиймати 2,8 миллиондан 3,3 миллионгача оширилди. Рушдийнинг ўзи одамлар бундай мукофот пулига қизиқаётганини исботловчи далиллар йўқлигини айтганди. 2012 йилда Рушдий «Шайтоний шеърлар» ҳақидаги баҳслардан кейин ўз ҳаёти ҳақида «Жозеф Антон: мемуарлар» номли ҳикоя чоп этди.
Изоҳ (0)