12-avgust kuni Odam savdosiga va majburiy mehnatga qarshi kurashish Milliy komissiyasining navbatdagi majlisi bo‘lib o‘tdi. Bu haqda Oliy Majlis Senati xabar berdi.
Qayd etilishicha, tadbirda Milliy komissiya a’zolari, mutasaddi vazirlik va idoralar, nodavlat notijorat tashkilotlari vakillari, shuningdek, ommaviy axborot vositalari xodimlari ishtirok etgan. Tanzila Narbayeva olib borgan majlisda odam savdosi va majburiy mehnatga qarshi kurashish borasida2022-yilning 6 oyi davomida amalga oshirilgan ishlar, soha bo‘yicha xalqaro hamkorlik doirasida erishilgan natijalar va kelgusidagi vazifalar to‘g‘risida so‘z yuritilgan.
Nazardat tutilgan davrda sohaga doir qonunchilik asoslarini mustahkamlash hamda qonunchilik bazasini xalqaro standartlarga muvofiqlashtirish ishlari davom ettirilgan. Xususan, 8 ta normativ-huquqiy hujjat, ya’ni 3 ta qonun, 1 ta prezident farmoni va 4 ta qarori qabul qilindi va amaliyotga tatbiq etilgan.
Shuningdek, Xalqaro mehnat tashkilotining “Qurilishda mehnat xavfsizligi va gigiyenasi to‘g‘risida”gi 167-sonli konvensiyasi ratifikatsiya qilindi. Mazkur konvensiyaning ratifikatsiya qilinishi qurilish sohasiga mehnat xavfsizligi va gigiyenasi bo‘yicha xalqaro standartlarni samarali joriy etishga xizmat qilishi ta’kidlangan.
Bu yo‘nalishdagi ishlarni takomillashtirish maqsadida Xalqaro mehnat tashkilotining sog‘liqni saqlash va qishloq xo‘jaligi sohalarida mehnat munosabatlarini tartibga solishni nazarda tutadigan tegishli konvensiyalarini ratifikatsiya qilish masalalari Milliy komissiya a’zolari tomonidan o‘rganilayotgani qayd etilgan.
Ta’kidlanishicha, AQSH Davlat departamenti tomonidan 2018-yilda e’lon qilingan “Odam savdosi bo‘yicha yillik hisobot”da O‘zbekiston quyi 3-daraja davlatlari qatoridan 2-darajadagi davlatlarning “nazorat ro‘yxatiga” o‘tkazilgan. Yaqinda e’lon qilingan navbatdagi hisobotda esa 2021-yildagi kabi xalqaro standartlarni to‘liq bajarish bo‘yicha keng ko‘lamli ishlarni amalga oshirayotgan davlatlar (2- toifa) ro‘yxatida o‘zgarishsiz qoldirilgan.
Hisobotda O‘zbekistonda pandemiya sharoitida odam savdosiga qarshi kurashish sohasida amalga oshirilgan ishlar yuqori baholangan. Xususan, odam savdosi bilan shug‘ullanuvchi shaxslar, shu jumladan, fuqarolarni majburiy mehnatga jalb qilgan rasmiylarni aniqlash va ularni jazoga tortish, paxta terimiga fuqarolarni majburiy jalb qilish holatlarining keskin qisqargani, odam savdosi qurbonlari uchun boshpanalar tashkil qilishga mablag‘ ajratish masalasiga katta e’tibor berilgani alohida qayd etilgan.
Tadbirda AQSH Davlat departamenti tomonidan e’lon qilingan Jahonda odam savdosi to‘g‘risidagi yillik ma’ruza hamda unda O‘zbekiston e’tibor qaratishi lozim bo‘lgan masalalar yuzasidan bildirilgan tavsiyalar muhokama etilib, mazkur tavsiyalarni amaliyotga tatbiq etish bo‘yicha alohida chora-tadbirlar rejasi qabul qilingan.
Milliy komissiyasi tomonidan tegishli vazirlik va idoralar bilan birgalikda ishlab chiqilgan O‘zbekiston to‘qimachilik sanoatiga xalqaro texnik standartlarni va ishlab chiqarish talablarini joriy etish bo‘yicha “Yo‘l xaritasi” loyihasi muhokama etilgan.
Mazkur “Yo‘l xaritasi”da to‘qimachilik korxonalarida texnik va ishlab chiqarish standartlarini xalqaro darajaga moslashtirish, xalqaro brend va yirik kompaniyalarning mahalliy korxonalar bilan hamkorlik qilishga, paxta-to‘qimachilik sanoatidagi korxonalarimiz faoliyatiga xalqaro tan olingan mehnat, ishlab chiqarish, texnik va boshqa standartlarni keng tatbiq qilishga qaratilgan 20 ga yaqin tadbirlarni amalga oshirish belgilangan.
Majlisda Milliy komissiya tarkibidagi Odam savdosiga qarshi kurashish masalalari bo‘yicha kichik komissiyaga rahbarlik qilayotgan Ichki ishlar vazirligi hamda Majburiy mehnatga qarshi kurashish masalalari bo‘yicha kichik komissiyaga rahbarlik qilayotgan Bandlik va mehnat munosabatlari vazirligining axborotlari ham eshitilgan.
Muhokama qilingan masalalar yuzasidan Milliy komissiyaning tegishli qarori qabul qilingan hamda kelgusidagi vazifalar belgilab olingan.
Izoh (0)