Miraziz Mirzaxalilov qirg‘izistonlik, Laziz Mullajonov esa britaniyalik bokschini muddatidan avval mag‘lub etdi

Toshkent shahri mezbonlida o‘tkazilayotgan professional boks oqshomi doirasidagi ikkita jang yakunlandi.

Mirazizbek Mirzaxalilov (2-0, 2 KO) prof boksdagi ikkinchi jangini Qirg‘iziston vakili Islam Torobayevga (0-1) qarshi o‘tkazdi. Jang har ikki bokschining faolligida boshlandi, vaqt o‘tgan sari Mirzaxalilov tizginni o‘z tomoniga og‘dirdi.

Uchinchi raundda Mirazizbek raqibning muvozanatdan chiqishiga sababchi bo‘lgan qator kuchli zarbalarni yo‘naltirdi. Uchinchi raunddan keyin Torobayev tomoni jangni davom ettira olmasligini ma’lum qildi va Mirzaxalilov texnik nokaut bilan g‘alaba qozondi.

Bu Mirazizbek uchun prof boksdagi ikkinchi g‘alaba bo‘ldi.

Yana bir jangda Lazizbek Mullajonov (3-0, 3 KO) Buyuk Britaniya vakili Maykl Bassetga (2-6, 2 KO) qarshi ringga chiqdi. Birinchi raund to‘liq o‘zbekistonlik bokschining ustunligida o‘tdi. Ikkinchi raundda Mullajonovning ketma-ket zarbalaridan keyin Bassetning sekundanti ringga sochiq uloqtirdi va texnik nokaut qayd etildi.

Shu tariqa Lazizbek professional boksdagi uchinchi jangini ham nokautli g‘alaba bilan yakunladi.