Shveysariya Rossiyada Ukraina manfaatlarini ifodalay olmaydi, chunki u Rossiyaga qarshi sanksiyalarga qo‘shildi va shu tariqa o‘zining betaraflik maqomini yo‘qotdi. Bu haqda Rossiya Tashqi ishlar vazirligi Axborot va matbuot departamenti direktori o‘rinbosari Ivan Nechayev ma’lum qildi, deb yozadi Meduza.
Uning so‘zlariga ko‘ra, Shveysariya anchadan buyon Rossiyada Ukraina manfaatlariga vakillik qilish va aksincha masalada Moskva fikri bilan qiziqib kelgan.
“Biz imkoni boricha aniq qilib javob berdikki, Shveysariya, afsuski, betaraf davlat maqomini yo‘qotdi va hech kimning manfaatlariga vakillik ham, vositachilik ham qila olmaydi”, — dedi Nechayev.
10-avgust kuni Shveysariya Tashqi ishlar vazirligi rasmiy vakili Pyer Alen Elchinger mamlakat “homiy davlat mandati”ni o‘z zimmasiga olishni taklif qilganini aytgandi. Bu Shveysariya Rossiyada Ukraina diplomatik manfaatlariga vakillik qilishi mumkinligini ko‘zda tutadi. Bunday manfaatlarga, xususan, “muzokaralar va uchrashuvlar uchun mezbonlik qiluvchi tomon roli”, shuningdek, “ehtimoliy muzokaralar”ga yordam ko‘rsatish kiradi.
Rossiya TIV matbuot xizmati Elchingerning bayonotini izohlar ekan, Shveysariya Ukrainada urush boshlanganidan keyin “Yevroittifoqning Rossiyaga qarshi noqonuniy cheklovlarining barcha yettita paketini qabul qilib”, Rossiya hukumati tomonidan tuzilgan “do‘st bo‘lmagan mamlakatlar” ro‘yxatiga tushganini qayd etdi.
Hozirgi paytda diplomatik xizmatlar missiyasi doirasida Shveysariya Rossiyaning Gruziyadagi va Gruziyaning Rossiyadagi, shuningdek, AQSHning Erondagi manfaatlariga vakillik qiladi.
Izoh (0)