Швейцария Россияда Украина манфаатларини ифодалай олмайди, чунки у Россияга қарши санкцияларга қўшилди ва шу тариқа ўзининг бетарафлик мақомини йўқотди. Бу ҳақда Россия Ташқи ишлар вазирлиги Ахборот ва матбуот департаменти директори ўринбосари Иван Нечаев маълум қилди, деб ёзади Meduza.
Унинг сўзларига кўра, Швейцария анчадан буён Россияда Украина манфаатларига вакиллик қилиш ва аксинча масалада Москва фикри билан қизиқиб келган.
«Биз имкони борича аниқ қилиб жавоб бердикки, Швейцария, афсуски, бетараф давлат мақомини йўқотди ва ҳеч кимнинг манфаатларига вакиллик ҳам, воситачилик ҳам қила олмайди», — деди Нечаев.
10 август куни Швейцария Ташқи ишлар вазирлиги расмий вакили Пьер Ален Эльчингер мамлакат «ҳомий давлат мандати»ни ўз зиммасига олишни таклиф қилганини айтганди. Бу Швейцария Россияда Украина дипломатик манфаатларига вакиллик қилиши мумкинлигини кўзда тутади. Бундай манфаатларга, хусусан, «музокаралар ва учрашувлар учун мезбонлик қилувчи томон роли», шунингдек, «эҳтимолий музокаралар»га ёрдам кўрсатиш киради.
Россия ТИВ матбуот хизмати Элчингернинг баёнотини изоҳлар экан, Швейцария Украинада уруш бошланганидан кейин «Евроиттифоқнинг Россияга қарши ноқонуний чекловларининг барча еттита пакетини қабул қилиб», Россия ҳукумати томонидан тузилган «дўст бўлмаган мамлакатлар» рўйхатига тушганини қайд этди.
Ҳозирги пайтда дипломатик хизматлар миссияси доирасида Швейцария Россиянинг Грузиядаги ва Грузиянинг Россиядаги, шунингдек, АҚШнинг Эрондаги манфаатларига вакиллик қилади.
Изоҳ (0)