Rossiyaga ishlash uchun borgan va salomatligida muammo yuzaga kelgan navoiylik erkak hamda uning oilasi O‘zbekistonga qaytarildi. Bu haqda Tashqi mehnat migratsiyasi agentligi xabar qildi.
Ma’lum bo‘lishicha, navoiylik R.F. oilasi bilan Rossiyaning Kamchatka o‘lkasiga 2021-yil tanishlari orqali ishlash uchun borgan. Qurilish obyektida ehtiyotsizlik tufayli yiqilib, og‘ir tan jarohati olgan va ish beruvchining yordami bilan jarrohlik amaliyotini o‘tagan.
Fuqaro biroz tuzalgandan so‘ng avval Ryazan viloyatiga, keyinchalik Nijegorod viloyatiga ishlash maqsadida oilasi bilan ko‘chib o‘tgan. Yana salomatligi yomonlashib, turmush o‘rtog‘i, 6 va 2 yoshli bolalari bilan murakkab vaziyatga tushib qolgan va Tashqi mehnat migratsiyasi agentligining Nijniy Novgorod shahridagi vakilligiga murojaat qilgan.
Xorijda mehnat faoliyatini amalga oshiruvchi fuqarolarni qo‘llab-quvvatlash hamda ularning huquq va manfaatlarini himoya qilish jamg‘armasi mablag‘lari hisobidan R.F. va uning turmush o‘rtog‘iga aviachipta rasmiylashtirilib, ular vatanga qaytarildi.
Izoh (0)