Qishloq xo‘jaligi vazirligi va Ummon Sultonligining Atyab International Services kompaniyasi muassisligida Qo‘qon oziq-ovqat texnologiyasi va muhandisligi xalqaro instituti tashkil etiladi. Bu haqda prezidentning tegishli qarori loyihasida e’lon qilindi.
Hujjatga ko‘ra, ushbu xalqaro institut O‘zbekiston qishloq xo‘jaligini rivojlantishning 2020—2030-yillarga mo‘ljallangan strategiyasida belgilangan vazifalar ijrosini samarali tashkil etish, qishloq xo‘jaligi va oziq-ovqat mahsulotlarini qayta ishlash, sohada xalqaro standartlar asosida oliy ma’lumotli yuqori malakali mutaxassislar tayyorlashni tashkil etish hamda O‘zbekistonning oliy ta’lim sohasidagi xalqaro hamkorligini yanada kengaytirish maqsadida tashkil etiladi.
Institut to‘liq akademik va moliyaviy mustaqil bo‘lgan davlat oliy ta’lim muassasasi hisoblanadi.
Ushbu oliygohda o‘qitish davlat ta’lim standartlarini hisobga olgan holda ingliz, rus va o‘zbek tillarida o‘qitish kunduzgi va sirtqi shakllarda hamda masofaviy ta’lim shaklida amalga oshiriladi. Uning bitiruvchilariga O‘zbekistonda oliy ta’lim to‘g‘risidagi hujjat sifatida tan olinadigan davlat namunasidagi diplom beriladi.
Qabul qilish parametrlari va tartibi, bitiruvchilarning yakuniy attestatsiyasi tartibi va sharoitlari institut tomonidan xorijiy hamkor bilan kelishgan holda belgilanadi.
Mavzuga doir: Vengriyadagi nufuzli OTM Qo‘qondagi xalqaro institut bilan hamkorlik qiladi
Izoh (0)