O‘zbekistondagi suv omborlarida 9,6 milliard kub metr suv zaxirasi mavjud. Bu 2021-yilga nisbatan 1,5 milliard kub metr ko‘p, deb xabar bermoqda AOKAda o‘tkazilgan brifingda Suv xo‘jaligi vazirligi axborot xizmati rahbari Shuhrat Suyunov.
Matbuot kotibi, shuningdek, 2022-yilgi sug‘orish mavsumida qancha miqdorda suv yetkazib berilishi yuzasidan ma’lumot berdi.
2022-yil boshidan buyon 344 ming 8 gektar maydonda, jumladan, 77 ming 793 gektar maydonda tomchilatib sug‘orish, 11 ming 431 gektar maydonda yomg‘irlatib sug‘orish, 4 ming 478 gektar maydonda diskret usulda sug‘orish texnologiyalari ishga tushirilgan.
66 ming 483 gektar maydonda ko‘chma egiluvchan quvurlar yordamida, 35 ming 35 gektar maydonda egatga plyonka to‘shab sug‘orish yo‘lga qo‘yilgan. 148 ming 789 gektar maydon lazerli tekislangan.
Yil yakuniga qadar 478 ming gektar maydonda suvni tejaydigan texnologiyalar joriy qilinishini ta’minlash va suv tejovchi texnologiyalar bilan qamrab olingan maydonlarni 27 foizga yetkazish maqsad qilingan.
Izoh (0)