Россияга ишлаш учун борган ва саломатлигида муаммо юзага келган навоийлик эркак ҳамда унинг оиласи Ўзбекистонга қайтарилди. Бу ҳақда Ташқи меҳнат миграцияси агентлиги хабар қилди.
Маълум бўлишича, навоийлик Р.Ф. оиласи билан Россиянинг Камчатка ўлкасига 2021 йил танишлари орқали ишлаш учун борган. Қурилиш объектида эҳтиётсизлик туфайли йиқилиб, оғир тан жароҳати олган ва иш берувчининг ёрдами билан жарроҳлик амалиётини ўтаган.
Фуқаро бироз тузалгандан сўнг аввал Рязань вилоятига, кейинчалик Нижегород вилоятига ишлаш мақсадида оиласи билан кўчиб ўтган. Яна саломатлиги ёмонлашиб, турмуш ўртоғи, 6 ва 2 ёшли болалари билан мураккаб вазиятга тушиб қолган ва Ташқи меҳнат миграцияси агентлигининг Нижний Новгород шаҳридаги вакиллигига мурожаат қилган.
Хорижда меҳнат фаолиятини амалга оширувчи фуқароларни қўллаб-қувватлаш ҳамда уларнинг ҳуқуқ ва манфаатларини ҳимоя қилиш жамғармаси маблағлари ҳисобидан Р.Ф. ва унинг турмуш ўртоғига авиачипта расмийлаштирилиб, улар ватанга қайтарилди.
Изоҳ (0)