Shavkat Mirziyoyev Toshkent viloyatining Bekobod shahrida metallurgiya tarmog‘i xodimlari va tadbirkorlar bilan uchrashuv o‘tkazmoqda, deb xabar bermoqda “Daryo” muxbiri.
Prezidentning aytishicha, metallurgiya sanoatini jadal rivojlantirish uchun to‘rtta asosiy masalalarga alohida e’tibor qaratish lozim.
“Birinchisi, metall ishlab chiqaruvchi korxonalarni xomashyo bilan kafolatli ta’minlash. Bu masalada metall xomashyosi yetishmovchiligini qoplash bo‘yicha mavjud salohiyatimiz va zaxiralardan qanchalik samarali foydalana olyapmiz, degan savolga javob topishimiz kerak. Misol uchun, faqatgina “metallo-lom”da ishlashga moslashgan 130 ta korxona past quvvatlarda ishlamoqda, 56 ta korxona esa, faoliyatini to‘xtatgan. Ayniqsa, bu masala Qoraqalpog‘iston, Andijon, Jizzax, Sirdaryo va Farg‘onada dolzarbligicha qolmoqda Nima uchun, viloyat hokimlari ushbu korxonalarni boshqa xomashyo turlariga moslashtirishni o‘ylamayapti? Issiq briketlangan temir bemalol import qilib, sohada xomashyo ta’minotini yaxshilash va ishlab chiqarishni keskin oshirish mumkin”, — deydi davlat rahbari.Shavkat Mirziyoyev metallurgiya sanoatini rivojlantirish uchun e’tibor qaratish lozim bo‘lgan ikkinchi masala haqida ham gapirdi.
“Metallo-prokat va temir list bo‘yicha o‘sayotgan talabni qondirish uchun, barcha viloyatlarda zamonaviy texnologiyalarga ega metall ishlab chiqaruvchi korxonalar tashkil qilishni qo‘llab-quvvatlash kerak. Misol uchun, respublika bo‘yicha metall ishlab chiqarish quvvatlari 2 million tonnadan ortiq bo‘lib, ular asosan Toshkent, Samarqand va Namangan viloyatlari hamda Toshkent shahrida joylashgan. Biroq, metall mahsulotlariga ehtiyoj yuqori bo‘lgan Xorazmda ushbu quvvatlar 4,5 ming tonnani, Andijonda – 7,5 ming tonna va Buxoroda – 8,5 ming tonnani tashkil etadi”, — deydi davlat rahbari.Yana bir masala — yuqori qo‘shilgan qiymat yaratadigan tarmoqlar, jumladan avtomobil va mashinasozlik, energetika, elektrotexnika sanoati uchun mahsulotlar hamda zamonaviy metall konstruksiyalar ishlab chiqarishga ustuvor ahamiyat berish lozim.
“Misol uchun, kelgusi yillarda qayta tiklanuvchi energetika sohasida 10 ming Mega-vatt quvvatlarni barpo etishni reja qilganmiz. 1 Megavatt quyosh stansiyasi uchun, 45 tonna metall konstruksiya, shamol stansiyasiga esa, 120 tonna metall kerak. Demak, birgina shu sohaning o‘ziga kamida 800 ming tonna metall kerak bo‘ladi”, — deydi Shavkat Mirziyoyev.So‘nggi, to‘rtinchi masala — soha raqobatbardosh bo‘lishi uchun, malakali kadrlar, ilm-fan va innovatsiyalar zarur.
“Misol uchun, 1 tonna qora metall qiymati jahon bozorida 600 dollar bo‘lsa, murakkab po‘lat qotishmalarining narxi tonnasiga 10 ming dollardan oshadi. Bunday innovatsiyaga asoslangan mahsulotlarni ishlab chiqarish uchun, avvalambor, chuqur bilimga ega geologlar, tog‘-kon va metall quyish muhandislari, kimyogar va texnologlar, materialshunoslar, IT va logistika kabi ko‘plab yo‘nalishlar bo‘yicha mutaxassislar kerak bo‘ladi”, — deya qo‘shimcha qildi prezident.
Izoh (0)