Шавкат Мирзиёев Тошкент вилоятининг Бекобод шаҳрида металлургия тармоғи ходимлари ва тадбиркорлар билан учрашув ўтказмоқда, деб хабар бермоқда «Дарё» мухбири.
Президентнинг айтишича, металлургия саноатини жадал ривожлантириш учун тўртта асосий масалаларга алоҳида эътибор қаратиш лозим.
«Биринчиси, металл ишлаб чиқарувчи корхоналарни хом ашё билан кафолатли таъминлаш. Бу масалада металл хом ашёси етишмовчилигини қоплаш бўйича мавжуд салоҳиятимиз ва захиралардан қанчалик самарали фойдалана оляпмиз, деган саволга жавоб топишимиз керак. Мисол учун, фақатгина «металло-лом»да ишлашга мослашган 130 та корхона паст қувватларда ишламоқда, 56 та корхона эса, фаолиятини тўхтатган. Айниқса, бу масала Қорақалпоғистон, Андижон, Жиззах, Сирдарё ва Фарғонада долзарблигича қолмоқда Нима учун, вилоят ҳокимлари ушбу корхоналарни бошқа хом ашё турларига мослаштиришни ўйламаяпти? Иссиқ брикетланган темир бемалол импорт қилиб, соҳада хом ашё таъминотини яхшилаш ва ишлаб чиқаришни кескин ошириш мумкин», — дейди давлат раҳбари.Шавкат Мирзиёев металлургия саноатини ривожлантириш учун эътибор қаратиш лозим бўлган иккинчи масала ҳақида ҳам гапирди.
«Металло-прокат ва темир лист бўйича ўсаётган талабни қондириш учун, барча вилоятларда замонавий технологияларга эга металл ишлаб чиқарувчи корхоналар ташкил қилишни қўллаб-қувватлаш керак. Мисол учун, республика бўйича металл ишлаб чиқариш қувватлари 2 миллион тоннадан ортиқ бўлиб, улар асосан Тошкент, Самарқанд ва Наманган вилоятлари ҳамда Тошкент шаҳрида жойлашган. Бироқ, металл маҳсулотларига эҳтиёж юқори бўлган Хоразмда ушбу қувватлар 4,5 минг тоннани, Андижонда – 7,5 минг тонна ва Бухорода – 8,5 минг тоннани ташкил этади», — дейди давлат раҳбари.Яна бир масала — юқори қўшилган қиймат яратадиган тармоқлар, жумладан автомобиль ва машинасозлик, энергетика, электротехника саноати учун маҳсулотлар ҳамда замонавий металл конструкциялар ишлаб чиқаришга устувор аҳамият бериш лозим.
«Мисол учун, келгуси йилларда қайта тикланувчи энергетика соҳасида 10 минг Мега-ватт қувватларни барпо этишни режа қилганмиз. 1 Мегаватт қуёш станцияси учун, 45 тонна металл конструкция, шамол станциясига эса, 120 тонна металл керак. Демак, биргина шу соҳанинг ўзига камида 800 минг тонна металл керак бўлади», — дейди Шавкат Мирзиёев.Сўнгги, тўртинчи масала — соҳа рақобатбардош бўлиши учун, малакали кадрлар, илм-фан ва инновациялар зарур.
«Мисол учун, 1 тонна қора металл қиймати жаҳон бозорида 600 доллар бўлса, мураккаб пўлат қотишмаларининг нархи тоннасига 10 минг доллардан ошади. Бундай инновацияга асосланган маҳсулотларни ишлаб чиқариш учун, авваламбор, чуқур билимга эга геологлар, тоғ-кон ва металл қуйиш муҳандислари, кимёгар ва технологлар, материалшунослар, IT ва логистика каби кўплаб йўналишлар бўйича мутахассислар керак бўлади», — дея қўшимча қилди президент.
Изоҳ (0)