“2026-yilga borib O‘zbekiston iqtisodiyotining ehtiyojlarini qondirish uchun 6 mln tonnaga yaqin metall kerak bo‘ladi” — prezident

Shavkat Mirziyoyev Toshkent viloyatining Bekobod shahrida metallurgiya tarmog‘i xodimlari va tadbirkorlar bilan uchrashuv o‘tkazmoqda, deb xabar bermoqda “Daryo” muxbiri.

Prezident 1940-yillarida ishga tushgan O‘zbekiston metallurgiya kombinati uzoq yillar O‘zbekistonda qora metallurgiya sohasida yagona yirik korxona bo‘lib kelganini qayd etdi.

“So‘nggi besh yildagi islohotlarimiz natijasida 200 ta yangi korxona tashkil etildi va 2021-yilning o‘zida sohada 16 trillion so‘mlik mahsulotlar ishlab chiqarildi (2017-yilda 4 trillion so‘m bo‘lgan). Ushbu korxonalarda 25 mingdan ziyod aholimiz mehnat qilmoqda. Sohada temir va temir mahsulotlari ishlab chiqarish 1,8 barobar o‘sib, 2 million tonnadan ko‘paydi. Kelgusida esa, birgina hozir borib ko‘rgan Quyuv prokat majmuasida yiliga yana 1 million tonna po‘lat listlari ishlab chiqariladi. Mazkur loyiha ishga tushgach, kombinat quvvatlari 2 baravarga oshadi”, — deydi davlat rahbari.

“Lekin, bugungi kunda iqtisodiyotimizda qora metallga bo‘lgan talab 4 million tonnani tashkil etib, uning 50 foizi import hisobidan qoplanmoqda. Xususan, qurilishda yiliga 2,4 million tonna, muhandislik tarmoqlari uchun – 680 ming tonna, sanoatda – 970 ming tonna, shundan mashinasozlik va elektrotexnikada – 450 ming tonna metall ishlatiladi. Kelgusi besh yilda metallga ehtiyoj mashinasozlikda – 1,4 barobarga, elektrotexnikada – 2 barobarga oshishi kutilmoqda. Shuningdek, hududlarda 7 mingdan ziyod ko‘p qavatli uylar quriladi”, — deydi prezident.