Buxoroda baxtsiz hodisa sabab uch kishi vafot etdi, biri kishi og‘ir tan jarohati oldi. Bu haqda “Daryo” muxbiri xabar berdi.
Ma’lum bo‘lishicha, Buxoro shahrida yashovchi 3 nafar yigit bir nafar samarqandlik tanishi bilan Cobalt avtomobilida A-380 magistral yo‘lining Qorovulbozor—Kogon yo‘nalishida harakatlanib kelib, temir yo‘ldan yuqori tezlikda o‘tib, beton to‘siqqa urilgan. Voqea taxminan kechasi 03:30 larda sodir bo‘lgan.
Oqibatda 19, 22 va 23 yoshli yigitlar voqea joyida vafot etgan. Bir nafar fuqaro esa og‘ir tan jarohati olib, shifoxonaga yotqizilgan.
Viloyat IIB axborot xizmati rahbarining bildirishicha, holat yuzasidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan va tergovga qadar tekshiruv harakatlari olib borilmoqda. Sud-tibbiy ekspertiza tayinlangan.
“Holat hozircha kimning aybi bilan sodir etilgani aniqlanmagan. Shu bois, sud qarori chiqmaguncha, to‘liq ma’lumot bera olmaymiz”, —dedi viloyat IIB YHXB axborot xizmati rahbari, kapitan Ulug‘bek Shukurullayev.
Izoh (0)