Ijtimoiy tarmoqlarda IIV JXD YHXX boshlig‘i Saidov Olim Choriqulovichga tegishliligi aytilgan “vizitka” surati tarqaldi. U ko‘chada qo‘lma-qo‘l bo‘lib ketgani, “vizitka”ni ko‘rgan YPX xodimlari har qanday qoidalar buzilishiga ko‘z yumayotgani aytilmoqda. Yo‘l harakati xavfsizligi xizmati bunga munosabat bildirdi.
Unda aytilishicha, suratda aks etgan “vizitka” soxta bo‘lib, IIV JXD YHXX boshlig‘i Saidov Olim Choriqulovichga tegishli emas. “O‘zbekiston Respublikasi IIB Yo‘l harakati xavfsizligi boshqarmasi boshlig‘i” deya noto‘g‘ri lavozim ko‘rsatilgani ham ushbu qog‘ozning soxta va firibgarlik maqsadida tayyorlanganining yaqqol isbotidir (to‘g‘ri nomlanishi — O‘zbekiston Respublikasi IIV JXD Yo‘l harakati xavfsizligi xizmati boshlig‘i).
Mazkur “vizitka” bilan bog‘liq holat 2022-yilda YPX xodimi tomonidan aniqlangan va tegishli tartibda bildirgi orqali ma’lum qilingan. Xodimning bildirgisi asosida tergovga qadar tekshiruv harakatlari olib borilib, Chilonzor tumani IIO FMB huzuridagi Tergov bo‘limi tomonidan 1996-yilda tug‘ilgan S.O.ga Jinoyat kodeksining 168-moddasi 3-qismi “b” bandi (takroran firibgarlik sodir etish) bilan jinoyat ishi qo‘zg‘atilib, hozirda tergov harakatlari olib borilmoqda.
“Tashrif qog‘ozi hech qanday huquqiy ahamiyatga ega emasligini va hech kimga muayyan huquq hamda imtiyoz bermasligini ma’lum qilamiz.
Shaxsning qadr-qimmati kamsitilishiga yoki uning obro‘sizlantirilishiga olib keladigan yolg‘on axborotni tarqatish javobgarlikka sabab bo‘lishini eslatib o‘tamiz”, — deyiladi Yo‘l harakati xavfsizligi xizmati xabarida.
Izoh (0)