AQSH O‘zbekistonni JSTga a’zo bo‘lish jarayonida qo‘llab-quvvatlashni davom ettiradi

Investitsiyalar va tashqi savdo vaziri Jamshid Xo‘jayev 10-avgust kuni AQSH elchisi Deniyel Rozenblyum bilan uchrashuv o‘tkazdi, deb xabar qilmoqda “Dunyo” axborot agentligi.

Qayd etilishicha, muzokaralar davomida O‘zbekiston—Amerika ko‘p qirrali hamkorligi kun tartibining dolzarb masalalari muhokama qilingan. O‘zaro qiziqish va ko‘p tomonlama aloqalarni o‘rnatishga intilish tufayli ikki tomonlama va mintaqaviy sheriklik yo‘nalishida erishilgan yutuqlar mamnuniyat bilan qayd etilgan.

Muzokaralar davomida tomonlar savdo-iqtisodiy sohadagi hamkorlikni chuqurlashtirish istiqbollarini har tomonlama ko‘rib chiqqan. Xususan, 2022-yilning birinchi yarimida o‘zaro tovar aylanmasining 31 foizga o‘sgani va bu ko‘rsatkich 247,5 million dollarga yetgani qayd etilgan. Savdo munosabatlarini jadallashtirish hamda import-eksport operatsiyalari nomenklaturasini kengaytirish bo‘yicha aniq tadbirlar belgilangan.

Muloqot davomida investitsiyaviy hamkorlik va sanoat kooperatsiyasini rivojlantirish imkoniyatlariga to‘xtalib o‘tilgan. So‘nggi bir necha yil ichida O‘zbekistonda Amerika kapitali asosida tashkil topgan korxonalar soni ikki baravar ko‘payib, 315 tani tashkil etgan. O‘zbekistonda Amerika kompaniyalarining iqtisodiy ishtirokini kengaytirishga o‘zaro qiziqish bildirilgan. Buning uchun tomonlar AQSHning yetakchi kompaniyalari va moliyaviy tashkilotlarini mamlakat hududida qo‘shma loyihalarni amalga oshirishga jalb qilish uchun imkoniyatlarni birlashtirishni rejalashtirgan.

Uchrashuv davomida ikki tomonlama munosabatlarning o‘zaro manfaatli boshqa masalalar ham ko‘rib chiqilgan. Masalan, "yashil" energetika, qishloq xo‘jaligi va yoshlar tadbirkorligini rivojlantirish doirasida AQSH Xalqaro taraqqiyot agentligi (USAID) bilan hamkorlikni davom ettirish, shuningdek, istiqbolli sohalarda turli loyihalarni amalga oshirishda AQSH Xalqaro taraqqiyot moliya korporatsiyasi (DFC) bilan hamkorlikni faollashtirishga kelishib olingan.

Bundan tashqari, tomonlar yillar davomida ikki mamlakat ishbilarmon doiralari va mintaqalari o‘rtasida yo‘lga qo‘yilgan mazmunli va samarali muloqotni davom ettirishga kelishib olgan.

Deniel Rozenblyum AQSHning Jahon savdo tashkilotiga a’zo bo‘lishi jarayonida O‘zbekistonni qo‘llab-quvvatlashni davom ettirishga sodiqligini bildirgan.

Uchrashuv yakunida erishilgan kelishuvlar va muhokama qilingan tashabbuslarni samarali amalga oshirish orqali O‘zbekiston va AQSHning ko‘p qirrali hamkorligiga yangi turtki berish mumkinligiga ishonch bildirilgan.