Iqtisodiy jinoyatlarga qarshi kurashish departamenti organlari tomonidan spirt va alkogol mahsulotlarni noqonuniy ishlab chiqarish va sotishning oldini olish borasida tezkor choralar ko‘rib borilmoqda. Bu bo‘yicha 2021 va 2022-yilning o‘tgan davrida 198 ta huquqbuzarlik holatlari aniqlanib, 81 ta jinoyat va 117 ta ma’muriy huquqbuzarlikka oid ishlar qo‘zg‘atildi.
Bunda aksiz markasiz yoki qalbaki aksiz markali mahsulotlarni muomalaga kiritilishi hamda ularning xomashyo manbalarini aniqlashga alohida e’tibor qaratib kelinmoqda. Alkogol mahsulotlarini noqonuniy ishlab chiqarishga ixtisoslashgan 19 ta yashirin sex faoliyatiga barham berildi.
O‘tkazilgan tezkor tadbirlar hamda tergovga qadar tekshiruv harakatlari natijasida yashirin sexlar orqali qo‘lbola usulda ishlab chiqarilgan 47,2 ming litr etil spirti mahsulotlari va 90,7 ming dona qalbaki aksiz markali, sifatsiz alkogolli mahsulotlarining noqonuniy muomalaga kiritilishining oldi olindi.
Huquqbuzarlardan 2,4 milliard so‘mlik alkogol hamda yashirin ishlab chiqarish uskuna va anjomlari ashyoviy dalil sifatida olindi. Departament organlari tomonidan ushbu yo‘nalishdagi profilaktika va tezkor-qidiruv tadbirlari izchillik bilan davom ettirilmoqda.
Izoh (0)