Инвестициялар ва ташқи савдо вазири Жамшид Хўжаев 10 август куни АҚШ элчиси Дениел Розенблюм билан учрашув ўтказди, деб хабар қилмоқда «Дунё» ахборот агентлиги.
Қайд этилишича, музокаралар давомида Ўзбекистон—Америка кўп қиррали ҳамкорлиги кун тартибининг долзарб масалалари муҳокама қилинган. Ўзаро қизиқиш ва кўп томонлама алоқаларни ўрнатишга интилиш туфайли икки томонлама ва минтақавий шериклик йўналишида эришилган ютуқлар мамнуният билан қайд этилган.
Музокаралар давомида томонлар савдо-иқтисодий соҳадаги ҳамкорликни чуқурлаштириш истиқболларини ҳар томонлама кўриб чиққан. Хусусан, 2022 йилнинг биринчи яримида ўзаро товар айланмасининг 31 фоизга ўсгани ва бу кўрсаткич 247,5 миллион долларга етгани қайд этилган. Савдо муносабатларини жадаллаштириш ҳамда импорт-экспорт операциялари номенклатурасини кенгайтириш бўйича аниқ тадбирлар белгиланган.
Мулоқот давомида инвестициявий ҳамкорлик ва саноат кооперациясини ривожлантириш имкониятларига тўхталиб ўтилган. Сўнгги бир неча йил ичида Ўзбекистонда Америка капитали асосида ташкил топган корхоналар сони икки баравар кўпайиб, 315 тани ташкил этган. Ўзбекистонда Америка компанияларининг иқтисодий иштирокини кенгайтиришга ўзаро қизиқиш билдирилган. Бунинг учун томонлар АҚШнинг етакчи компаниялари ва молиявий ташкилотларини мамлакат ҳудудида қўшма лойиҳаларни амалга оширишга жалб қилиш учун имкониятларни бирлаштиришни режалаштирган.
Учрашув давомида икки томонлама муносабатларнинг ўзаро манфаатли бошқа масалалар ҳам кўриб чиқилган. Масалан, "яшил" энергетика, қишлоқ хўжалиги ва ёшлар тадбиркорлигини ривожлантириш доирасида АҚШ Халқаро тараққиёт агентлиги (USAID) билан ҳамкорликни давом эттириш, шунингдек, истиқболли соҳаларда турли лойиҳаларни амалга оширишда АҚШ Халқаро тараққиёт молия корпорацияси (DFC) билан ҳамкорликни фаоллаштиришга келишиб олинган.
Бундан ташқари, томонлар йиллар давомида икки мамлакат ишбилармон доиралари ва минтақалари ўртасида йўлга қўйилган мазмунли ва самарали мулоқотни давом эттиришга келишиб олган.
Дэниэл Розенблюм АҚШнинг Жаҳон савдо ташкилотига аъзо бўлиши жараёнида Ўзбекистонни қўллаб-қувватлашни давом эттиришга содиқлигини билдирган.
Учрашув якунида эришилган келишувлар ва муҳокама қилинган ташаббусларни самарали амалга ошириш орқали Ўзбекистон ва АҚШнинг кўп қиррали ҳамкорлигига янги туртки бериш мумкинлигига ишонч билдирилган.
Изоҳ (0)