O‘zbekiston va Turkmaniston transport sohasidagi hamkorlik aloqalarini rivojlantirishning muhim yo‘nalishlari belgilab olindi, deb xabar bermoqda Transport vazirligi matbuot xizmati.
Ma’lum qilinishicha, 8—9-avgust kunlari bo‘lib o‘tgan transport masalalari bo‘yicha o‘zbek turkman ishchi guruhining navbatdagi uchrashuvida ikki mamlakatning avtomobil, temir yo‘l, aviatsiya tizimi tashkilotlar vakillari ishtirokida bo‘lib o‘tgan uchrashuvda transport sohasidagi hamkorlik aloqalarini rivojlantirish istiqbollari muhokama etildi.
Xususan, tomonlar ikki davlat o‘rtasida avtomobil transportida yuk tashuvlar jarayonini to‘liq qayta tiklash, shuningdek, yuk tashish talablarini soddalashtirishdan manfaatdor ekanliklarini qayd etib o‘tgan. O‘zbekiston tomoni avtomobil transportida xalqaro yuk tashuvlarini amalga oshirayotgan o‘zbek haydovchilari uchun Turkmanistonga kirish vizasini berish talablarini soddalashtirish va muddatlarini qisqartirish yuzasidan turkman tomoniga takliflarini bildirgan.
Tomonlar, shuningdek, temir yo‘l va avtomobil transportida yuk tashuvlari hajmini oshirish maqsadida transport koridorlarini rivojlantirish yo‘nalishidagi hamkorlik aloqalarini kengaytirish yuzasidan fikr almashgan.
O‘zbekiston tomoni “Turkmanboshi” porti orqali o‘tuvchi transport koridorlari butun mintaqa uchun muhim ekani va ushbu yo‘nalishdagi hamkorlik aloqalarini rivojlantirish zarurligini ta’kidlab o‘tgan. Tomonlar tranzit yo‘nalishlarda yuk tashish hajmini oshirish uchun temir yo‘l infratuzilmasini yanada modernizatsiya qilish, shuningdek, yuk tashuvlarida transport xarajatlarini kamaytirish maqsadida chegirmalar taqdim etish choralarini ko‘rishga kelishib olgan.
Uchrashuvda, O‘zbekiston tomoni mamlakatlar o‘rtasida yo‘lovchi tashishni tashkil etish yo‘nalishidagi ishlarni faollashtirishni taklif qilgan. Tomonlar O‘zbekiston–Turkmaniston–Eron–Ummon transport koridorining barcha ishtirokchilari bilan Ashxobod shartnomasi doirasidagi ishlarni faollashtirishga kelishib oldi.
Uchrashuv davomida tomonlar xalqaro yuk tashishni amalga oshirish bilan bog‘liq boshqa amaliy masalalarni ham ko‘rib chiqilgan.
Mavzuga doir: O‘zbekiston Turkmaniston orqali yuklarni tranzit yuborishga ruxsat oldi
Izoh (0)