Farg‘onada DTM imtihonlari paytida ko‘zida nuqsoni bor 64 yoshli abituriyentga yordam ko‘rsatildi

Farg‘ona davlat universiteti stadionida oliy ta’lim muassasalari uchun kirish imtihonlari paytida ko‘rishda nuqsoni bor abituriyentga yordam ko‘rsatildi. Bu haqda Davlat test markazi xabar qildi.

Qayd etilishicha, 10-avgust kuni 2-smenada Farg‘ona davlat universiteti stadionida o‘tkazilgan test sinovida abituriyent M.O. (64 yosh) test topshiriqlarini ishlab bo‘lganidan so‘ng ko‘zi yaxshi ko‘rmasligini, chiroq yorug‘ida javoblarni belgilashda doirachalarni adashtirib yuborayotganini aytib, javoblarni ko‘chirib berishda yordam so‘ragan.

Holat DTM xodimlari tomonidan ko‘rib o‘rganilgan hamda abituriyentga test topshiriqlari kitobida belgilangan javoblarni javoblar varaqasiga bo‘yash uchun shu guruhdagi test topshiriqlarini ishlab bo‘lib, topshirgan abituriyent (M.A.) tomonidan yordam ko‘rsatilgan.

Bunda yordam so‘ragan abituriyent qaysi savolga qaysi javobni belgilash kerakligini aytib turgan. Yordamchi abituriyent javoblar varaqasiga bo‘yashga yordam bergan.

Jarayon guruhdagi qolgan abituriyentlarning roziligi asosida xodimlar va guruh nazoratchilari kuzatuvi ostida amalga oshirilgan.