Toshkent shahri Yakkasaroy tumani Shota Rustaveli ko‘chasida daraxtlar shikastlanishi bilan bog‘liq yana bir holat aniqlandi. Bu haqda Davlat ekologiya qo‘mitasi xabar qildi.
Qayd etilishicha, ijtimoiy tarmoqda tarqalgan murojaat yuzasidan qo‘mita mas’ullari va Toshkent shahar ekologiya boshqarmasi xodimlari, Yakkasaroy tumani hokimiyati hamda jamoatchilik vakillari tomonidan joyiga chiqib o‘rganish ishlari amalga oshirilgan. Natijada Shota Rustaveli ko‘chasidagi 28-uy yonida qurilish kompaniyasi tomonidan qurilish ishlari olib borilayotgani aniqlangan. Mazkur qurilish ishlari jarayonida 5 tup chinor va 7 tup kashtan daraxtlarining ildiz qismlariga o‘sishdan to‘xtamaydigan darajada shikast yetkazilgan. Daraxtlarning sug‘orish tizimi olib tashlangan.
Buning oqibatida O‘zbekiston Respublikasining “O‘simlik dunyosini muhofaza qilish va undan foydalanish to‘g‘risida”gi qonunining 26 va 32-moddalari talablari buzilgan.
Daraxtlarni muhofaza qilish va saqlashga doir qonunchilikda belgilangan choralarni ko‘rmaganligi uchun Millimetre construction company MCHJ rahbari U.R.ga nisbatan Ma’muriy javobgarlik to‘g‘risidagi kodeksining 79-moddasi (daraxtlarni, butalarni, boshqa o‘simliklarni va nihollarni qonunga xilof ravishda kesish, kundakov qilish, shikastlantirish, yo‘q qilish yoki boshqa joyga ko‘chirib o‘tkazish) 3-qismi bilan tegishli hujjatlar rasmiylashtirildi va huquqni muhofaza qiluvchi organlarga qonuniy chora ko‘rish uchun taqdim etilmoqda.
Shuningdek, qurilish kompaniyasi mas’ullariga hududdagi mavjud daraxtlarni muhofaza qilish, ularga biotexnik tadbirlarni amalga oshirish va ekologik talablar yuzasidan tegishli ko‘rsatmalar berilib, kafolat xati olingan.
Mavzuga doir:
Izoh (0)