Ўзбекистон ва Туркманистон автотранспортда юк ташишни тўлиқ қайта тикламоқчи

Ўзбекистон ва Туркманистон транспорт соҳасидаги ҳамкорлик алоқаларини ривожлантиришнинг муҳим йўналишлари белгилаб олинди, деб хабар бермоқда Транспорт вазирлиги матбуот хизмати.

Маълум қилинишича, 8—9 август кунлари бўлиб ўтган транспорт масалалари бўйича ўзбек туркман ишчи гуруҳининг навбатдаги учрашувида икки мамлакатнинг автомобиль, темир йўл, авиация тизими ташкилотлар вакиллари иштирокида бўлиб ўтган учрашувда транспорт соҳасидаги ҳамкорлик алоқаларини ривожлантириш истиқболлари муҳокама этилди.

Хусусан, томонлар икки давлат ўртасида автомобиль транспортида юк ташувлар жараёнини тўлиқ қайта тиклаш, шунингдек, юк ташиш талабларини соддалаштиришдан манфаатдор эканликларини қайд этиб ўтган. Ўзбекистон томони автомобиль транспортида халқаро юк ташувларини амалга ошираётган ўзбек ҳайдовчилари учун Туркманистонга кириш визасини бериш талабларини соддалаштириш ва муддатларини қисқартириш юзасидан туркман томонига таклифларини билдирган.

Томонлар, шунингдек, темир йўл ва автомобиль транспортида юк ташувлари ҳажмини ошириш мақсадида транспорт коридорларини ривожлантириш йўналишидаги ҳамкорлик алоқаларини кенгайтириш юзасидан фикр алмашган.

Ўзбекистон томони «Туркманбоши» порти орқали ўтувчи транспорт коридорлари бутун минтақа учун муҳим экани ва ушбу йўналишдаги ҳамкорлик алоқаларини ривожлантириш зарурлигини таъкидлаб ўтган. Томонлар транзит йўналишларда юк ташиш ҳажмини ошириш учун темир йўл инфратузилмасини янада модернизация қилиш, шунингдек, юк ташувларида транспорт харажатларини камайтириш мақсадида чегирмалар тақдим этиш чораларини кўришга келишиб олган.

Учрашувда, Ўзбекистон томони мамлакатлар ўртасида йўловчи ташишни ташкил этиш йўналишидаги ишларни фаоллаштиришни таклиф қилган. Томонлар Ўзбекистон–Туркманистон–Эрон–Уммон транспорт коридорининг барча иштирокчилари билан Ашхобод шартномаси доирасидаги ишларни фаоллаштиришга келишиб олди.

Учрашув давомида томонлар халқаро юк ташишни амалга ошириш билан боғлиқ бошқа амалий масалаларни ҳам кўриб чиқилган.

Мавзуга доир: Ўзбекистон Туркманистон орқали юкларни транзит юборишга рухсат олди