Ekvador banan sanoati sovuq ob-havo sharoitida qo‘shimcha qiyinchiliklarga duch kelmoqda, bu mahsulot yetishtirishni taxminan 25 foizga qisqartirdi. Bu haqda EastFruit xabar bermoqda.
Bu, shuningdek, Rossiya, Yevropa, Yaqin Sharq va boshqa bozorlarda yozda bananga talab pasayishi bilan bir vaqtga to‘g‘ri kelmoqda, ayni holat yilning shu davriga xosdir, — deydi Ekvador Banan marketingi va eksporti assotsiatsiyasining (Acorbanec) ijrochi direktori Richard Salazar.
Ushbu qo‘shimcha muammolarning bari jahondagi eng yirik banan eksportyori bo‘lmish Ekvadordagi banan yetishtiruvchilar iyun oyi oxiridagi 18 kunlik milliy norozilik namoyishlaridan keyin me’yoriy savdoga qaytishga umid qilgan paytga to‘g‘ri keldi.
EastFruit’ning FreshPlaza havolasiga tayanib xabar berishicha, banan yetishtiriladigan asosiy hududlarda yo‘llarni to‘sib qo‘ygan tub aholining noroziliklari tufayli 2 000 ga yaqin banan konteynerlarini olib chiqish imkoni bo‘lmagan.
Namoyish to‘xtatilgandan so‘ng banan yetishtirish va eksport faoliyati me’yoriy holatga qaytdi, biroq hozir eksport hajmi kamayganini ko‘ryapmiz, chunki, ayrim fermer xo‘jaliklarida fitosanitariya holati banan eksporti sifatiga monand emas, — deydi Salazar.
Ma’lum bo‘lishicha, sovuq ob-havo tufayli banan yetishtirish o‘rtacha 20-25 foizga kamaygan.
Salazarning so‘zlariga ko‘ra, bozor sharoitlari joriy yilning dekabriga qadar yaxshilanishi kutilmoqda.
Avvalroq O‘zbekistonda deyarli barcha bananlar Ekvadordan keltirilishi haqida xabar berilgan edi.
Yanvar—iyun oylariga ko‘ra, sotib olingan bananlarning 97,6 foizi (25,9 mln dollar) Ekvadorga tegishli. Ushbu davlatdan banan importi o‘tgan yil bilan solishtirganda ikki barorga oshgan.
Izoh (0)