Эквадор банан саноати совуқ об-ҳаво шароитида қўшимча қийинчиликларга дуч келмоқда, бу маҳсулот етиштиришни тахминан 25 фоизга қисқартирди. Бу ҳақда EastFruit хабар бермоқда.
Бу, шунингдек, Россия, Европа, Яқин Шарқ ва бошқа бозорларда ёзда бананга талаб пасайиши билан бир вақтга тўғри келмоқда, айни ҳолат йилнинг шу даврига хосдир, — дейди Эквадор Банан маркетинги ва экспорти ассоциациясининг (Acorbanec) ижрочи директори Ричард Салазар.
Ушбу қўшимча муаммоларнинг бари жаҳондаги энг йирик банан экспортёри бўлмиш Эквадордаги банан етиштирувчилар июнь ойи охиридаги 18 кунлик миллий норозилик намойишларидан кейин меъёрий савдога қайтишга умид қилган пайтга тўғри келди.
EastFruit’нинг FreshPlaza ҳаволасига таяниб хабар беришича, банан етиштириладиган асосий ҳудудларда йўлларни тўсиб қўйган туб аҳолининг норозиликлари туфайли 2 000 га яқин банан контейнерларини олиб чиқиш имкони бўлмаган.
Намойиш тўхтатилгандан сўнг банан етиштириш ва экспорт фаолияти меъёрий ҳолатга қайтди, бироқ ҳозир экспорт ҳажми камайганини кўряпмиз, чунки, айрим фермер хўжаликларида фитосанитария ҳолати банан экспорти сифатига монанд эмас, — дейди Салазар.
Маълум бўлишича, совуқ об-ҳаво туфайли банан етиштириш ўртача 20-25 фоизга камайган.
Салазарнинг сўзларига кўра, бозор шароитлари жорий йилнинг декабрига қадар яхшиланиши кутилмоқда.
Аввалроқ Ўзбекистонда деярли барча бананлар Эквадордан келтирилиши ҳақида хабар берилган эди.
Январь—июнь ойларига кўра, сотиб олинган бананларнинг 97,6 фоизи (25,9 млн доллар) Эквадорга тегишли. Ушбу давлатдан банан импорти ўтган йил билан солиштирганда икки барорга ошган.
Изоҳ (0)