Tovar-xomashyo birjasi O‘zbekistonning xorijdagi elchixonalar bilan 5 ta yangi savdo maydonchalarini ochdi
O‘zbekiston tovar-xomashyo birjasi xorijiy hamkorlar, dunyoning yetakchi birjalari, xalqaro moliya tashkilotlari va ishbilarmonlari bilan aloqalarni mustahkamlash hamda xorijiy savdo tarmog‘ini kengaytirish bo‘yicha amaliy ishlarni davom ettirmoqda.
Tovar-xomashyo birjasi O‘zbekistonning xorijdagi elchixonalar bilan birgalikda 5 ta yangi xorijiy savdo maydonchalarini ochdi.
Xususan birjaning xorijdagi yangi tayanch ofislari Rossiya, Turkiya, Ozarbayjon va Tojikiston kabi mamlakatlarda o‘z faoliyatlarini boshladi.
Yangi xorijiy savdo maydonchalarini ochishdan ko‘zlangan asosiy maqsad birja savdolarining bozor mexanizmlaridan foydalangan holda tadbirkorlar va tovar ishlab chiqaruvchilarning O‘zbekiston va boshqa davlatlarning tovar bozorlariga erkin kirishini ta’minlashdan iboratdir.
Xorijiy savdo maydonchalarning faollashuvi natijasida 2022-yil yanvar—iyul oylarida O‘zbekiston tovar-xomashyo birjasida 120 dan ziyod yangi norezident mijozlar akkreditatsiyadan o‘tkazildi hamda 257 mln dollarlik tashqi savdo bitimlari tuzildi.
Mamlakatda oziq-ovqat xavfsizligini ta’minlash va ichki bozorlarda narx-navo barqarorligini saqlash maqsadida o‘tgan davrda birjaning savdo maydonchalari orqali 483,4 ming tonna bug‘doy import qilingan bo‘lib, bu o‘tgan yilning 7-oyiga nisbatan 17 marotabaga ko‘pdir.
Avvalroq O‘zbekistonda donning bir qismi iyul—sentabr oylarida birja savdolari orqali sotilishi belgilangani haqida xabar berilgandi.
