Samarqand viloyatining Nurobod tumanida 1 gektar yer maydonini 10 ming dollarga sotishga uringan fuqaro qo‘lga olindi. Bu haqda “Daryo”ga viloyat IIB axborot xizmati ma’lum qildi.
Ta’kidlanishicha, viloyatdagi huquqni muhofaza qiluvchi organlarga tadbirkorlik bilan shug‘ullanmoqchi bo‘lib, blok ishlab chiqarish sexini qurishni niyat qilgan fuqaroga Nurobod tumanida yashovchi I.T. tumanning “Mehnatkash” mahallasi hududida joylashgan hokimlik zaxirasidagi 1 gektar yer maydonini sotishga urinayotgani xabar qilingan.
Yerni sotmoqchi ekanini aytgan shaxs tuman Kadastr bo‘limidagi tanishlari orqali yerni hujjatlashtirib berishini ham aytgan. Va oldindan 5 ming dollar talab qilgan.
Arizaga asosan, viloyat IIB JQB Korrupsiya va iqtisodiy jinoyatlarga qarshi kurashish bo‘limi Yer resurslari talon-toroj qilinishiga qarshi kurashish bo‘linmasi va viloyat prokuraturasi xodimlari hamkorligida tezkor tadbir o‘tkazilgan. Tadbirda I.T. ariza muallifidan firibgarlik yo‘li bilan 5 ming dollar miqdoridagi pullarni olgan vaqtida ashyoviy dalillar bilan qo‘lga olingan.
Mazkur holat yuzasidan tergovga qadar tekshirish harakatlari olib borilmoqda.
Izoh (0)