Самарқанд вилоятининг Нуробод туманида 1 гектар ер майдонини 10 минг долларга сотишга уринган фуқаро қўлга олинди. Бу ҳақда «Дарё»га вилоят ИИБ ахборот хизмати маълум қилди.
Таъкидланишича, вилоятдаги ҳуқуқни муҳофаза қилувчи органларга тадбиркорлик билан шуғулланмоқчи бўлиб, блок ишлаб чиқариш цехини қуришни ният қилган фуқарога Нуробод туманида яшовчи И.Т. туманнинг «Меҳнаткаш» маҳалласи ҳудудида жойлашган ҳокимлик захирасидаги 1 гектар ер майдонини сотишга уринаётгани хабар қилинган.
Ерни сотмоқчи эканини айтган шахс туман Кадастр бўлимидаги танишлари орқали ерни ҳужжатлаштириб беришини ҳам айтган. Ва олдиндан 5 минг доллар талаб қилган.
Аризага асосан, вилоят ИИБ ЖҚБ Коррупция ва иқтисодий жиноятларга қарши курашиш бўлими Ер ресурслари талон-торож қилинишига қарши курашиш бўлинмаси ва вилоят прокуратураси ходимлари ҳамкорлигида тезкор тадбир ўтказилган. Тадбирда И.Т. ариза муаллифидан фирибгарлик йўли билан 5 минг доллар миқдоридаги пулларни олган вақтида ашёвий далиллар билан қўлга олинган.
Мазкур ҳолат юзасидан терговга қадар текшириш ҳаракатлари олиб борилмоқда.
Изоҳ (0)