“Yaxshiyam onajonim bor ekan”. Sirdaryoda ayol o‘g‘liga bir buyragini berdi

Sirdaryo viloyatida ilk bor buyrak ko‘chirish amaliyoti o‘tkazildi. Bu haqda Sog‘liqni saqlash vazirligi matbuot xizmati xabar bermoqda.

Sog‘liqni saqlash vazirligi tashabbusi bilan Sirdaryoda bo‘lib o‘tayotgan sog‘lomlashtirish aksiyasi doirasida viloyatdagi bir qator tibbiyot muassasalarida poytaxtdan kelgan malakali shifokorlar boshchiligida ko‘plab yuqori texnologiyali murakkab operatsiyalar o‘tkazilmoqda.

Xususan, akademik V.Vohidov nomidagi respublika ixtisoslashtirilgan xirurgiya ilmiy-amaliy tibbiyot markazining malakali mutaxassislari va mahalliy shifokorlar hamkorligida Sirdaryo viloyatida ilk bor noyob jarrohlik amaliyoti — buyrak transplantatsiyasi amalga oshirildi.

Bemor Davron Abdurahmonov 23 yoshda bo‘lib, bundan to‘rt yil avval unga surunkali buyrak yetishmovchiligi tashxisi qo‘yilgan. Bir yil o‘tmay esa gemodializ muolajalarini ola boshlagan. Biroq kasallik terminal bosqichga o‘tgani sababli uni hayotga qaytarishning yagona usuli sifatida buyrak ko‘chirib o‘tkazish amaliyoti tavsiya etilgan.

“Guliston tibbiyot klasteri”da amalga oshirilgan mazkur operatsiya qariyb 5 soat davom etdi. Unda bemorga 53 yoshli onasi Hafiza Berdiyorovaning bir buyragi ko‘chirib o‘tkazildi. Hozir o‘g‘il va onaning ahvoli yaxshi va shifokorlar tomonidan tibbiy nazoratga olingan.

Yosh bo‘lsam-da, bu kasallikdan ko‘p azob chekdim. Qolaversa, har 3—4 kunda gemodializ muolajasi orqali qonimni tozalatishga majbur edim. Yaxshiyam onajonim bor ekan. Ularning mehri tufayli yana hayotga qaytyapman. Buning uchun ulardan minnatdorman, — deydi bemor Abdurahmonov operatsiyadan oldingi suhbatda.