Сирдарё вилоятида илк бор буйрак кўчириш амалиёти ўтказилди. Бу ҳақда Соғлиқни сақлаш вазирлиги матбуот хизмати хабар бермоқда.
Соғлиқни сақлаш вазирлиги ташаббуси билан Сирдарёда бўлиб ўтаётган соғломлаштириш акцияси доирасида вилоятдаги бир қатор тиббиёт муассасаларида пойтахтдан келган малакали шифокорлар бошчилигида кўплаб юқори технологияли мураккаб операциялар ўтказилмоқда.
Хусусан, академик B.Воҳидов номидаги республика ихтисослаштирилган хирургия илмий-амалий тиббиёт марказининг малакали мутахассислари ва маҳаллий шифокорлар ҳамкорлигида Сирдарё вилоятида илк бор ноёб жарроҳлик амалиёти — буйрак трансплантацияси амалга оширилди.
Бемор Даврон Абдураҳмонов 23 ёшда бўлиб, бундан тўрт йил аввал унга сурункали буйрак етишмовчилиги ташхиси қўйилган. Бир йил ўтмай эса гемодиализ муолажаларини ола бошлаган. Бироқ касаллик терминал босқичга ўтгани сабабли уни ҳаётга қайтаришнинг ягона усули сифатида буйрак кўчириб ўтказиш амалиёти тавсия этилган.
«Гулистон тиббиёт кластери»да амалга оширилган мазкур операция қарийб 5 соат давом этди. Унда беморга 53 ёшли онаси Ҳафиза Бердиёрованинг бир буйраги кўчириб ўтказилди. Ҳозир ўғил ва онанинг аҳволи яхши ва шифокорлар томонидан тиббий назоратга олинган.
Ёш бўлсам-да, бу касалликдан кўп азоб чекдим. Қолаверса, ҳар 3—4 кунда гемодиализ муолажаси орқали қонимни тозалатишга мажбур эдим. Яхшиям онажоним бор экан. Уларнинг меҳри туфайли яна ҳаётга қайтяпман. Бунинг учун улардан миннатдорман, — дейди бемор Абдураҳмонов операциядан олдинги суҳбатда.Шифокорларнинг таъкидлашича, бугунги кунда замонавий трансплантология оғир буйрак хасталикларига чалинган кўплаб беморлар ҳаётини сақлаб қолиш имконини бермоқда.
Изоҳ (0)