Davlat qarzini samarali sarflanishi bo‘yicha nazorat tizimi kuchaytiriladi. Bu haqda Senat tomonidan bugun, 4-avgust kuni ma’qullangan “Davlat qarzi to‘g‘risida”gi qonunda belgilangan, deya xabar bermoqda “Daryo” muxbiri.
Foto: Oliy Majlis Senati
Senatning 29-yalpi majlisida “Davlat qarzi to‘g‘risida”gi qonun ko‘rib chiqildi. Parlament yuqori palatasining qo‘mita raisi Erkin Gadoyev qonunda ko‘zda tutilgan ba’zi masalalarga to‘xtaldi.
“Qonunda davlat qarzi yalpi ichki mahsulot(YAIM)ning 60 foizidan oshmasligi belgilanmoqda. Parlamentga davlat qarzi bo‘yicha hisobotni eshitish vakolati berilmoqda. Shu bilan birga, davlat qarzini boshqarish strategiyasi ishlab chiqilishi ko‘zda tutilmoqda. Qonun bilan davlat tomonidan jalb qilingan mablag‘lar samaradorligi, maqsadli sarflanishi bo‘yicha nazorat o‘rnatiladi. Hujjatda davlat qarzi to‘g‘risidagi ma’lumotlar ochiqligini ta’minlash ko‘zda tutilmoqda. Xususan, rasmiy saytlar va OAV orqali barcha ma’lumotlar ochiq yoritib borilishi ta’minlanadi”, – dedi senator.
Moliya vaziri o‘rinbosari Odiljon Isoqovning ma’lum qilishicha, davlat tomonidan jalb qilingan kreditlar bir necha soxalarga ajratilgan.
“Hozirgi kunda umumiy davlat qarzi 25,9 milliard dollarni, davlat tashqi qarzi 22,3 milliard dollarni tashkil etadi. Mazkur mablag‘lar budjetni qo‘llab-quvvatlash, sanoat, qishloq xo‘jaligi va boshqa sohalarga yo‘naltirilgan. Hozirda davlat qarzi YAIMning 37 foizini tashkil qilmoqda. 2022-yil oxirigacha bu ko‘rsatkich 40 foizgacha borishi prognoz qilinmoqda. Yana 20 foizgacha qarz olish imkonimiz bo‘ladi”, – dedi vazir o‘rinbosari.
Qonun normalariga muvofiq, Moliya vazirligi davlat qarzini boshqarish bo‘yicha vakolatli organ etib belgilanmoqda. Davlat qarzi va davlatning shartli majburiyatlari bo‘yicha xatarlarni boshqarish, davlat qarzini boshqarishning asosiy prinsiplari, maqsadlari va strategiyasi hamda davlat qarzi bo‘yicha majburiyatlarni o‘z vaqtida va to‘liq bajarilishi, davlat qarzini barqaror darajada saqlashga qaratilgan normalar aniq belgilab berilmoqda.
Qonunda davlat kafolatini berish tartibi, davlat kafolati berilmaydigan holatlar, qarz oluvchi-rezidentlarning majburiyatlari, davlat kafolatini bekor qilishga oid qoidalar o‘z aksini topgan. Qonun senatorlar tomonidan ma’qullandi.
Izoh (0)