Buyrak transplantatsiyasi – anchayin murakkab amaliyot. Shu sababli ham og‘ir xastalikdan aziyat chekkan ko‘plab yurtdoshlarimiz yaqin-yaqingacha bunday noyob operatsiya uchun ilg‘or xorijiy mamlakatlarga davo istab borishga majbur edi.
Bugun esa vaziyat butkul boshqacha. So‘nggi yillarda O‘zbekiston tibbiyotidagi ijobiy o‘zgarishlar natijasida deyarli barcha murakkab jarrohlik amaliyotlari O‘zbekistonning o‘zida, mahalliy shifokorlarimiz tomonidan muvaffaqiyatli amalga oshirilmoqda.
Misol uchun, ayni paytda mamlakatda 3000 nafardan ortiq bemor dasturli dializ muolajasini qabul qiladi. Bu esa bemor holatini biroz qiyinlashtiradi. Jismoniy holatiga, sog‘lig‘iga jiddiy ta’sir etadi.
Eng yomoni, ularning 1178 nafari surunkali buyrak yetishmovchiligining terminal bosqichida bo‘lib, transplantatsiya operatsiyasiga muhtoj. Shu kungacha O‘zbekistonda birgina Akademik V.Vohidov nomidagi Respublika ixtisoslashtrilgan xirurgiya ilmiy-amaliy tibbiyot markazida yaqin qarindoshlar orasida 711 ta ana shunday murakkab amaliyot o‘tkazildi.
“Transplantatsiya xizmati zamonaviy jarrohlik va umuman tibbiyotni rivojlantirishning istiqbolli yo‘nalishlaridan. Qolaversa, sohaning eng murakkab, o‘ta mas’uliyatli va ayni paytda ehtiyoj ortib borayotgan yo‘nalishlaridan biri ham aynan tana a’zolarini ko‘chirib o‘tkazish amaliyoti hisoblanadi. Biroq bundan 5-6 yil ilgari bu masala juda qiyin edi. Aniqrog‘i, O‘zbekistonda transplantatsiya amaliyotlarining huquqiy asoslari mavjud bo‘lmagan.
Buning ustiga mutaxassislar borasida ham muammolarimiz yetarli edi. Davlatimiz rahbarining bevosita e’tibori tufayli markazimizda jarrohlikning eng murakkab yo‘nalishlarini ishlab chiqish imkonini berdi.
Natijada o‘tgan 2021-yilning o‘zida muassasada 230 ta ana shunday amaliyot bajarildi. 2022-yilning birinchi 6 oyida esa 143 ta operatsiya muvaffaqiyatli o‘tkazildi”, — deydi mazkur markaz direktori Saidmurod Ismailov.
Buyrak transplantatsiyasiga bo‘lgan yuqori ehtiyoj tufayli bugungi kunda markazda bunday murakkab amaliyotlar ikki smenada, ya’ni haftasiga 7-8 nafar bemorda bajarilmoqda.
Ushbu jarrohlik amaliyotlarining samarasi yetakchi xorijiy klinikalarning bu boradagi natijalaridan qolishmasligi kishini quvontiradi.
Izoh (0)