Давлат қарзини самарали сарфланиши бўйича назорат тизими кучайтирилади. Бу ҳақда Сенат томонидан бугун, 4 август куни маъқулланган «Давлат қарзи тўғрисида»ги қонунда белгиланган, дея хабар бермоқда «Дарё» мухбири.
Фото: Олий Мажлис Сенати
Сенатнинг 29-ялпи мажлисида «Давлат қарзи тўғрисида»ги қонун кўриб чиқилди. Парламент юқори палатасининг қўмита раиси Эркин Гадоев қонунда кўзда тутилган баъзи масалаларга тўхталди.
«Қонунда давлат қарзи ялпи ички маҳсулот(ЯИМ)нинг 60 фоизидан ошмаслиги белгиланмоқда. Парламентга давлат қарзи бўйича ҳисоботни эшитиш ваколати берилмоқда. Шу билан бирга, давлат қарзини бошқариш стратегияси ишлаб чиқилиши кўзда тутилмоқда. Қонун билан давлат томонидан жалб қилинган маблағлар самарадорлиги, мақсадли сарфланиши бўйича назорат ўрнатилади. Ҳужжатда давлат қарзи тўғрисидаги маълумотлар очиқлигини таъминлаш кўзда тутилмоқда. Хусусан, расмий сайтлар ва ОАВ орқали барча маълумотлар очиқ ёритиб борилиши таъминланади», – деди сенатор.
Молия вазири ўринбосари Одилжон Исоқовнинг маълум қилишича, давлат томонидан жалб қилинган кредитлар бир неча сохаларга ажратилган.
«Ҳозирги кунда умумий давлат қарзи 25,9 миллиард долларни, давлат ташқи қарзи 22,3 миллиард долларни ташкил этади. Мазкур маблағлар бюджетни қўллаб-қувватлаш, саноат, қишлоқ хўжалиги ва бошқа соҳаларга йўналтирилган. Ҳозирда давлат қарзи ЯИМнинг 37 фоизини ташкил қилмоқда. 2022 йил охиригача бу кўрсаткич 40 фоизгача бориши прогноз қилинмоқда. Яна 20 фоизгача қарз олиш имконимиз бўлади», – деди вазир ўринбосари.
Қонун нормаларига мувофиқ, Молия вазирлиги давлат қарзини бошқариш бўйича ваколатли орган этиб белгиланмоқда. Давлат қарзи ва давлатнинг шартли мажбуриятлари бўйича хатарларни бошқариш, давлат қарзини бошқаришнинг асосий принциплари, мақсадлари ва стратегияси ҳамда давлат қарзи бўйича мажбуриятларни ўз вақтида ва тўлиқ бажарилиши, давлат қарзини барқарор даражада сақлашга қаратилган нормалар аниқ белгилаб берилмоқда.
Қонунда давлат кафолатини бериш тартиби, давлат кафолати берилмайдиган ҳолатлар, қарз олувчи-резидентларнинг мажбуриятлари, давлат кафолатини бекор қилишга оид қоидалар ўз аксини топган. Қонун сенаторлар томонидан маъқулланди.
Изоҳ (0)