Toshkent viloyatida gaz ta’minoti bo‘limi boshlig‘i ishdan olindi, yana bir xodimga jinoyat ishi qo‘zg‘atildi

Toshkent viloyatining Toshkent tumanida “Toshkenttumangaz” gaz ta’minoti bo‘limi boshlig‘i ishdan olindi, servis xizmati bo‘limi xodimiga jinoyat ishi qo‘zg‘atildi. Bu haqda “Hududgazta’minot” matbuot xizmati xabar berdi.

“Hududgazta’minot” AJning Komplayens-nazorat boshqarmasining ma’lum qilishicha, iyul oyida “Nanila farm” MCHJ rahbari  “Toshkenttumangaz” gaz ta’minoti bo‘limining servis xizmati bo‘limi xodimi D.H.dan yangi gaz hisoblash uskunasini o‘rnatishda ko‘mak berishni va 13 million so‘m miqdoridagi qarzdorlikni yopib berishni so‘ragan. Avvalroq esa, MCHJ rahbari “Toshkenttumangaz” gaz ta’minoti bo‘limi boshlig‘i I.Y.ga yordam so‘rab murojaat qilgan, ammo undan rad javobini olgan.

Servis xizmati xodimi D.H. “Nanila Farm” MCHJ rahbarining takroriy qo‘ng‘iroq va iltimoslaridan so‘ng masalani hal qilishda ko‘maklashishga qaror qiladi va mukofot sifatida 8 million so‘m so‘ragan. Tuman oshxonalaridan birida 300 ming so‘m va 700 dollar miqdorida pora olayotgan paytida huquq-tartibot idoralari tomonidan qo‘lga olingan.

Vaziyatni o‘rganish davomida aniqlanishicha, “Nanila Farm” MCHJ tabiiy gazdan qarzdorligi uchun gaz ta’minoti tarmog‘idan uzib qo‘yilgan. Bugungi kunda o‘ziga yuklatilgan vazifaga lozim darajada yondashmaganligi va beparvo munosabatda bo‘lgani uchun “Toshkenttumangaz” gaz ta’minoti bo‘limi boshlig‘i I.Y. bilan mehnat shartnomasi bekor qilingan. Servis xizmati xodimi D.H.ga nisbatan o‘rnatilgan tartibda jinoiy ish qo‘zg‘atilgan bo‘lib, tergov harakatlari olib borilmoqda.

“Hududgazta’minot” gaz ta’minoti xodimlaridan noqonuniy xatti-harakatlar kuzatilganda zudlik bilan fuqarolardan 1104 qisqa raqami bilan bog‘lanishlarini yoki Facebook’dagi “Gaz ta’minotidagi muammolar va ularni hal etish yo‘llari” guruhiga xabar yuborishga chaqirdi

“Bugungi kunda tizimda zamonaviy axborot texnologiyalari joriy etilgan bo‘lib bunda inson omilining ta’sir doirasi mavjud emas. Xodimlar tomonidan Tabiiy gaz hisobini avtomatlashtirilgan tizimiga kirish, shuningdek gaz iste’moli hajmlari ko‘rsatkichlarini kamaytirish imkoniyatiga ega emas. Shu bois har qanday noqonuniy kelishishlar befoyda va mantiqsizdir”, — deyiladi “Hududgazta’minot” xabarida.