Xitoy 3-avgustdan Tayvanga tabiiy qum yetkazib berishni to‘xtatishga qaror qildi. Bu haqda Xitoy Savdo vazirligi xabar berdi.
Xitoy bojxona xizmati ma’lumotlariga ko‘ra, shuningdek, 3-avgustdan boshlab Tayvandan sitrus mevalar va ikki turdagi baliq importi ham to‘xtatilgan.
Bundan tashqari, Xitoy fuqarolari va kompaniyalariga Tayvanning ikki fondi bilan biznes yuritish taqiqlandi. Xitoy hukumati ushbu fondlarni ayirmachilikni qo‘llab-quvvatlash va Xitoyni qoralashda ayblamoqda.
Xitoy Tayvanning asosiy savdo sherigi hisoblanadi. 2021-yili ularning savdosi 26 foizga o‘sib, 328 milliard dollarni tashkil etdi. Shu bilan birga, Tayvan importdan ko‘ra ko‘proq eksport qildi.
2020-yilda Tayvan deyarli 5,7 million tonna qum va shag‘al import qilgan edi (shundan 8 foizini beton va asfalt ishlab chiqarishda ishlatiladigan tabiiy qum tashkil etgan). Ushbu hajmning o‘ndan to‘qqiz qismini Xitoy yetkazib bergan. Xitoy 2007-yilda ham Tayvanga qum eksportini taqiqlagan edi; bu bir yildan keyin bekor qilingan.
2-avgust kuni AQSH Kongressi Vakillar palatasi spikeri Nensi Pelosi — Amerika siyosiy tizimidagi uchinchi shaxs Tayvanga uchib ketdi (Kongress quyi palatasi spikeri 1997-yildan beri Tayvanga kelmagan). Pelosi Tayvan parlamentiga tashrif buyurdi va orolning ijrochi direktori Say Inven bilan uchrashdi hamda unga “Mehribon bulutlar” ordenini topshirdi.
Pelosining Tayvanga tashrifi Xitoy rasmiylarini g‘azablantirdi. Ular Tayvan yaqinida harbiy mashg‘ulotlar o‘tkazilishini e’lon qildi.
Izoh (0)