Ўзбекистон, Озарбайжон ва Туркия ташқи ишлар, савдо, иқтисодиёт ва транспорт вазирларининг биринчи уч томонлама учрашуви бўлиб ўтди. Уч давлат президентларининг келишувларига мувофиқ ташкил этилган ушбу мутлақо янги мулоқот механизми кўплаб устувор масалалар бўйича манфаатлар кесишадиган нуқталарни топишга имкон берди, деб хабар қилди Инвестициялар ва ташқи савдо вазирлиги.
Қайд этилишича, учрашув давомида ташқи сиёсат масалалари ва минтақавий ҳамкорлик имкониятлари, иқтисодиёт, савдо, инвестициялар ва транспорт соҳаларида учала мамлакат бирлашган салоҳиятини тўлиқ рўёбга чиқаришга қаратилган саъй-ҳаракатлар юзасидан фикр алмашилган.
Сўнгги беш йил ичида Ўзбекистоннинг Озарбайжон ва Туркия билан савдо айланмаси икки бараварга ошгани, 2021 йил охирига келиб бу кўрсаткич 3,5 миллиард долларга етгани айтилган. Ўзбекистон Республикаси инвестициялар ва ташқи савдо вазирининг биринчи ўринбосари Азиз Қудратов мамлакатлар ўртасидаги товар айирбошлаш ҳажмини икки баравар ошириш учун барча зарур шарт-шароитлар мавжудлигини таъкидлаган. Ўзбекистон Озарбайжон ва Туркияга техника, ўзбек тўқимачилиги маҳсулотлари, пойабзал ва озиқ-овқат етказиб бериш ҳажмини ошириш имкониятига эга.
Бозорларга ўзаро киришни осонлаштириш учун янги электрон тижорат платформасини яратиш таклиф қилинган. Бу тадбиркорлар, экспортчилар, импортчилар ўртасида мулоқотни осонлаштириб, товарларни арзон нархларда сотиш имконини беради.
Шунингдек, ишлаб чиқариш кооперациясини ривожлантириш, энергетика соҳасида ҳамкорлик қилиш ва уч мамлакатнинг юқори транзит салоҳиятидан фойдаланиш бўйича қўшма лойиҳаларни амалга ошириш имкониятлари кўриб чиқилган. Шунингдек, ҳудудлараро ҳамкорликни чуқурлаштириш устувор вазифа сифатида белгиланган ва шу муносабат билан ҳар йили Ўзбекистон–Озарбайжон–Туркия ҳудудлараро форумини ташкил қилиш ва унинг Тошкентда биринчи йиғилишини ўтказиш таклиф қилинган.
Учрашув якунида форум майдонларидаги барча келишувларни ўз ичига олган Тошкент декларацияси имзоланган. Эришилган барча келишувлар кўплаб минтақавий ва халқаро масалалар бўйича ўзаро ҳамкорликни мустаҳкамлашга қаратилган.
Мавзуга доир:
Изоҳ (0)