Hind milliy kinosining mukofotlash marosimi: Surya va Kajolning turmush o‘rtog‘i Ajay Devgan eng yaxshi aktyor deb topildi

Hindistonning 68-milliy kino mukofotlash marosimi 22-iyul kuni bo‘lib o‘tdi, unda Bollivudning eng yaxshi kino ijodkorlari taqdirlandi.

Tamillik rejissor Sudha Kongara tomonidan 2020-yilda suratga olingan “Mardlarga olqishlar bo‘lsin” filmi 5 ta mukofotni qo‘lga kiritdi. Bular — “Eng yaxshi film”, “Eng yaxshi rejissor”, “Eng yaxshi musiqa” (G.V.Prakash Kumar) va “Eng yaxshi aktyor” nominatsiyalaridir.

Ushbu filmda bosh rolni ijro etgan Surya va “Tanaji: Ko‘rinmas jangchi” filmidagi ishtiroki uchun Bollivud yulduzi Kajolning turmush o‘rtog‘i Ajay Devgan “Eng yaxshi aktyor” nominatsiyasida g‘olib deb topilgan. Surya o‘zi yaratgan 2D Entertainment’da loyihani suratga oldi. Kinokartina Deccan Airlines asoschisi G.R. Gopinatning hayoti haqidagi voqealarni o‘z ichiga oladi.

“Mardlarga olqishlar bo‘lsin” filmi hind tilida qayta ishlandi va unda aktyor Akshay Kumar ishtirok etdi. Bu esa tomoshabinlarni hayratda qoldirmadi, sababi Surya yil boshida Bollivud remeykida epizod rolni ijro etishini tasdiqlagan edi.

Shu bilan birga, milliy mukofotlash marosimida rejissor Madonna Eshvin ham mukofotni qo‘lga kiritdi, “Mandela” filmidagi rejissorlik debyuti uchun ikkita: “Eng yaxshi dialog” va “Tamil tilidagi eng yaxshi debyut” nominatsiyalarida g‘oliblikni qo‘lga kiritdi.

Aktyorlar Suxas va Chandini Chovdari ishtirokidagi “Rangli fotosurat” kinokartinasi “Eng yaxshi telugu filmi” nominatsiyasida mukofotni qo‘lga kiritdi.

Malayalam filmi “Ayyappan va Koshi”, shuningdek, “Eng yaxshi ayol xonanda” yo‘nalishida Nanjamma, “Eng yaxshi yordamchi aktyor” nominatsiyasida Biju Menon, “Eng yaxshi tryuklarni sahnalashtiruvchi” yo‘nalishida Rajasekhar mukofotlarga sazovor bo‘ldi. “Shivaranjani va bir qancha boshqa ayollar” antologiyasi “Tamil tilida eng yaxshi badiiy film” mukofotini oldi.

“Eng yaxshi hind filmi” nominatsiyasida “Toolsidas Junior” filmi (o‘tgan yili vafot etgan Rajiv Kapurning so‘nggi filmi) g‘olib bo‘ldi.

Hind milliy kino mukofotlash marosimida har yili kino sohasida eng yaxshi natijalarga erishganlar mukofotlanadi. O‘tgan yili 67-milliy kino mukofotlash marosimida “Bhonsle” filmidagi roli uchun Manoj Bajpayi va “Demon” kinokartinasidagi ishtiroki uchun Danush “Eng yaxshi aktyor” yo‘nalishida g‘olib bo‘lgan. “Manikarnika” kinokartinasidagi roli uchun Kangana Ranaut “Eng yaxshi aktrisa” deb topilgan.

Mavzuga doir: “Hech qachon ongli ravishda aktyor bo‘lishni maqsad qilmaganman”: Bollivud aktyori, Kajolning turmush o‘rtog‘i Ajay Devgan 53 yoshda (foto).