“Meros” filmi rejissori, aktyor Hilol Nasimov nima sababdan “Meros” kinokartinasida bosh rolni o‘g‘li Fotih Nasimovga berganini va nima sababdan uni filmlariga olishi haqida aytdi. Bu haqda Kinematografiya agentligi “Daryo”ga ma’lum qildi.
“Meros” filmida bosh rolni ijro etgani haqida
“O‘zbekistonda Fotih Nasimov mening o‘g‘lim ekanini bilishadi. Festivalga borganimizda, to‘g‘ri kimlardir yana o‘g‘lini olib kelibdi degan bo‘lishi mumkin, biroq “Meros” filmining bosh rol ijrochisi bo‘lgani uchun ular taklif qildi. Shu bilan birga yo‘l haqqini to‘lashdi, oziq-ovqat, joy bilan ta’minlashdi. Shu filmni ko‘rib bosh rol ijrochisiga rossiyalik rejissor Sergey Rusakovning o‘zi qarsak chaldi. Keyin bu mening o‘g‘lim dedim”, — deydi Hilol Nasimov.
Hilol Nasimov nima sababdan filmlarida o‘g‘liga bosh rolni beradi?
“O‘zbekni chiroyli odatlari bilan birga ozgina qitmirligi bor. Nufuzli tadbirlarning birida bir inson har doim filmlarimga o‘g‘limni olishimni aytdi. Agar o‘g‘lim rolga to‘g‘ri kelmasa men uni filmlarimga olmayman. Katta o‘g‘lim rolga to‘g‘ri kelmadi, uni olmadim. Katta o‘g‘limni hech kim ko‘rmaydi, lekin u ham aktyorlik sohasini bitirgan. Rolga jismoniy jihatdan, jasorati to‘g‘ri kelsa, ularga rol beraman. Nima sababdan olmasligim kerak? Agar u rolni yaxshi o‘ynay olmagan bo‘lsa, e’tirozi bo‘lsa erkakchasiga aytsin”, — deydi rejissor.
Ma’lumot uchun Kinematografiya agentligi buyurtmasiga binoan suratga olingan “Meros” filmi iyul oyida Hindistonda o‘tkazilgan “Oltin tulpor” (Golden Horse Film Festival) xalqaro kinofestivalida “Eng yaxshi xorijiy film” nominatsiyasi bo‘yicha g‘olib bo‘lgan edi. Film ushbu kinofestivalda “Eng yaxshi rejissorlik ishi” nominatsiyasi bo‘yicha ham e’tirof etildi. Mazkur film may oyida Rossiyada bo‘lib o‘tgan “Zolotoy Vityaz” kinoforumida “Qozoq va o‘zbek xalqlari o‘rtasidagi an’ana va munosabatlarning umumiyligi mavzusini ochib bergani uchun” maxsus diplom bilan taqdirlangan.
Izoh (0)